باجوڑ اور بنوں میں پولیس چوکیوں پر حملے، نوجوان اغوا

واشنگٹن (ڈیلی اردو رپورٹ)پاکستان کے شورش زدہ صوبے خیبر پختونخوا کے ضلع باجوڑ کے علاقے شندی موڑ میں جناح بس ٹرمینل کے قریب پولیس چوکی پر نامعلوم دہشت گردوں نے ہینڈ گرنیڈ پھینک دیا۔ 

پولیس کے مطابق حملے میں کسی قسم کا جانی نقصان نہیں ہوا جبکہ علاقے کو گھیرے میں لے کر سرچ آپریشن شروع کر دیا گیا ہے۔

ادھر ضلع بنوں کے تھانہ ڈومیل پر بھی نامعلوم دہشت گردوں نے ہینڈ گرنیڈ پھینک کر حملہ کیا اور موقع سے فرار ہوگئے۔ پولیس کے مطابق اس حملے میں بھی کوئی جانی نقصان نہیں ہوا۔

ایک اور واقعے میں بنوں کے کاشو پل پولیس چوکی پر نامعلوم دہشت گردوں نے کواڈ کوپٹر ڈرون کے ذریعے حملہ کیا۔ پولیس حکام کے مطابق اس حملے میں اہلکار محفوظ رہے تاہم ایک راہگیر زخمی ہوا جسے طبی امداد کے لیے ہسپتال منتقل کر دیا گیا۔

دریں اثنا بنوں کے علاقے ماندیو، جو تھانہ میریان کی حدود میں آتا ہے، مقامی مسجد سے پولیس اہلکار ذاکر خان کے بیٹے محمد کو نامعلوم مسلح دہشت گردوں نے اغوا کر لیا۔ 

پولیس ذرائع کے مطابق محمد کو نماز کے دوران اغوا کر کے نامعلوم مقام پر منتقل کر دیا گیا۔