بارکھان میں دہشت گردوں کے حملے میں ڈی ایس پی مرید بگٹی ہلاک، گن مین زخمی

کوئٹہ (ڈیلی اردو) پاکستان کے شورش زدہ صوبہ بلوچستان کے ضلع بارکھان میں نامعلوم مسلح دہشت گردوں کے حملے میں پولیس کے ڈپٹی سپرنٹنڈنٹ (ڈی ایس پی) مرید بگٹی ہلاک جبکہ ان کے ساتھ موجود گن مین زخمی ہو گئے۔ واقعے کے بعد علاقے میں سرچ آپریشن شروع کر دیا گیا ہے۔

سرکاری حکام کے مطابق منگل کی شب بارکھان کے علاقے میں نامعلوم مسلح دہشت گردوں نے ناکہ بندی کر رکھی تھی۔ ڈی ایس پی مرید بگٹی ایک نجی گاڑی میں اپنے گن مین کے ہمراہ سفر کر رہے تھے کہ مسلح افراد نے ان کی گاڑی کو روک لیا۔

ابتدائی اطلاعات کے مطابق حملہ آوروں نے انہیں اغوا کرنے کے بعد فائرنگ کر دی، جس کے نتیجے میں ڈی ایس پی مرید بگٹی ہلاک ہو گئے، جبکہ ان کے ساتھ موجود گن مین زخمی ہو گیا، جسے طبی امداد کے لیے اسپتال منتقل کر دیا گیا۔

وزیراعلیٰ بلوچستان کے معاون برائے میڈیا شاہد رند نے واقعے کی تصدیق کرتے ہوئے کہا کہ دہشت گردوں کے حملے میں ڈی ایس پی مرید بگٹی ہلاک اور ایک پولیس اہلکار زخمی ہوا ہے۔

انہوں نے کہا کہ ضلع بارکھان کے علاقے رکھنی میں حملہ آوروں کی تلاش کے لیے سکیورٹی فورسز اور قانون نافذ کرنے والے اداروں نے سرچ آپریشن شروع کر دیا ہے۔

شاہد رند نے کہا کہ ریاست دشمن عناصر کے خلاف کارروائیاں منطقی انجام تک جاری رہیں گی اور بلوچستان میں امن و امان کو خراب کرنے والوں کے ساتھ سختی سے نمٹا جائے گا۔

حکام کے مطابق واقعے کی مزید تحقیقات جاری ہیں، جبکہ حملہ آوروں کی گرفتاری کے لیے علاقے میں سکیورٹی مزید سخت کر دی گئی ہے۔