برطانیہ: مانچسٹر کی مرکزی مسجد میں تراویح کے دوران ہتھیاروں سمیت داخل شخص گرفتار

مانچسٹر (ڈیلی اردو) برطانیہ کے شہر مانچسٹر میں نمازِ تراویح کے دوران ایک شخص کو چاقو، کلہاڑی اور دیگر ہتھیاروں سمیت مسجد میں داخل ہونے پر گرفتار کر لیا گیا، جبکہ دوسرے مشتبہ شخص کی تلاش جاری ہے۔ وزیرِ اعظم کیئر سٹارمر نے واقعے پر تشویش کا اظہار کیا ہے۔

پولیس کے مطابق منگل کی شب تقریباً 8 بج کر 40 منٹ پر وکٹوریہ پارک، رشولم میں اپر پارک روڈ پر واقع مانچسٹر کی مرکزی مسجد میں دو مشکوک افراد کی موجودگی کی اطلاع ملی۔

گریٹر مانچسٹر پولیس کا کہنا ہے کہ 40 سال سے زائد عمر کے ایک شخص کو جارحانہ ہتھیار اور کلاس بی منشیات رکھنے کے شبہ میں گرفتار کیا گیا ہے۔

مسجد انتظامیہ کے مطابق ایک شخص بڑا بیگ اٹھائے اس وقت مسجد میں داخل ہوا جب تقریباً دو ہزار نمازی تراویح ادا کر رہے تھے۔ رضاکاروں نے بیگ میں کلہاڑی دیکھی تو اسے علیحدہ کمرے میں لے جایا گیا جہاں سے چاقو اور ہتھوڑے سمیت دیگر اشیا برآمد ہوئیں۔

پولیس حکام کے مطابق واقعے میں کوئی زخمی نہیں ہوا اور نہ ہی کسی کو براہِ راست دھمکی دی گئی۔ تایم تحقیقات جاری ہیں۔