برطانیہ میں کالعدم تنظیم ’’فلسطین ایکشن‘‘ کی حمایت میں احتجاج، 500 افراد گرفتار

لندن (ڈیلی اردو) برطانوی حکومت نے اتوار کو اعلان کیا کہ پولیس کو بار بار ہونے والے مظاہروں پر سخت کارروائی کے اختیارات دیے جائیں گے، یہ اعلان ایک فلسطین نواز کالعدم تنظیم حماس کی حمایت میں ہونے والے مظاہرے میں تقریباً 500 افراد کی گرفتاری کے بعد کیا گیا۔

وزارتِ داخلہ نے کہا کہ پولیس اب کسی علاقے میں ’’بار بار ہونے والے احتجاجوں کے مجموعی اثرات‘‘ کو مدنظر رکھتے ہوئے ریلیوں اور مظاہروں پر شرائط عائد کر سکے گی۔

وزیرِ داخلہ شبانہ محمود نے کہا، ’’احتجاج کا حق ہمارے ملک میں ایک بنیادی آزادی ہے، لیکن اس آزادی کو دوسروں کے اس حق کے ساتھ متوازن ہونا چاہیے کہ وہ خوف کے بغیر اپنی زندگی گزار سکیں۔ بڑے اور بار بار ہونے والے مظاہرے بعض مذہبی برادریوں کو غیر محفوظ، خوفزدہ اور گھروں سے نکلنے سے ہچکچانے پر مجبور کر دیتے ہیں۔‘‘

زیادہ تر یہ مظاہرے پُرامن رہے ہیں لیکن ناقدین کا کہنا ہے کہ ان سے بعض اوقات سامیت مخالف جذبات کو ہوا ملی ہے۔ کچھ یہودیوں کا کہنا ہے، ’’دریا سے سمندر تک، فلسطین آزاد ہو گا‘‘ جیسے نعروں سے وہ خود کو خطرے میں محسوس کرتے ہیں۔ چند مظاہرین کو حماس کی حمایت پر گرفتار بھی کیا گیا ہے، جو برطانیہ میں ایک کالعدم تنظیم ہے۔

جمعرات کو مانچسٹر کی ایک عبادت گاہ پر حملے میں دو یہودی افراد کی ہلاکت کے بعد پولیس اور سیاست دانوں نے شہریوں سے اپیل کی تھی کہ وہ اس ہفتے احتجاج سے گریز کریں۔ وزیرِ اعظم کیئر سٹارمر نے کہا کہ مظاہرین کو ’’برطانوی یہودی برادری کے غم کا احترام کرنا چاہیے۔‘‘

تاہم ہفتے کو تقریباً ایک ہزار افراد نے ٹریفالگر اسکوائر میں احتجاج کیا، جہاں انہوں نے ’’میں نسل کشی کی مخالفت کرتا ہوں، میں فلسطین ایکشن کی حمایت کرتا ہوں‘‘ جیسے پوسٹرز اٹھا رکھے تھے۔ پولیس نے 488 افراد کو کالعدم تنظیم کی حمایت کے الزام میں گرفتار کیا۔

حکومت نے جولائی میں ’’فلسطین ایکشن‘‘  کو دہشت گرد تنظیم قرار دیا تھا۔ ناقدین کے مطابق حکومت آزادیِ اظہار اور احتجاج کے حق کو محدود کر رہی ہے۔