بلوچستان: آواران میں سیکیورٹی فورسز کے قافلے پر حملہ، 2 اہلکار ہلاک، 5 زخمی

کوئٹہ (بیورو رپورٹ) صوبہ بلوچستان کے ضلع آواران کی تحصیل مشکے کے علاقے کنیرا میں سیکورٹی فورسز کے قافلے پر دہشت گردوں کے حملے میں دو اہلکار ہلاک اور پانچ زخمی ہو گئے ہیں۔

کوئٹہ میں سرکاری حکام کے مطابق یہ واقعہ پیراندر کے علاقے کنیرہ کے علاقے میں پیش آیا۔

حکام کا کہنا ہے کہ سکیورٹی فورسز کے افسران اور اہلکار کنیرہ کے علاقے سے واپس جارہے تھے کہ پہلے سے گھات لگا کر بیٹھے ہوئِے نامعلوم مسلح افراد نے ان پر حملہ کر دیا۔

ہلاک ہونے والے اہلکاروں کی شناخت لانس نائیک محمد منیر اور سپاہی گل ولی شاہ کے نام سے ہوئی ہے۔

سکیورٹی فورسز پر ہونے والے اس حملے کی ذمہ داری کالعدم عسکریت پسند تنظیم بلوچستان لبریشن فرنٹ نے قبول کی ہے۔

ترجمان گہرام بلوچ نے دعویٰ کیا ہے کہ حملے میں فوج کے گیارہ اہلکار ہلاک اور متعدد زخمی ہوئے۔