بلوچستان: دہشت گرد حملوں میں پولیس اور سکیورٹی اہلکاروں سمیت 5 ہلاک

کوئٹہ (ڈیلی اردو) پاکستان کے شورش زدہ صوبے بلوچستان کے دیگر علاقوں میں پیر کی شب اور صبح کے دوران ہونے والے دہشت گردانہ حملوں میں پولیس اور سیکورٹی فورسز کے اہلکاروں سمیت پانچ افراد ہلاک اور چھ زخمی ہوگئے۔

ضلع جھل مگسی میں مسلح افراد نے کوٹھڑہ کے علاقے میں پولیس اسٹیشن پر قبضے کی کوشش کی، جسے پولیس نے ناکام بنایا۔ 

فائرنگ کے دوران ایک راہگیر بچہ ہلاک اور تین پولیس اہلکار زخمی ہوئے۔ 

پولیس نے ڈیڑھ سے دو گھنٹے تک حملہ آوروں کا مقابلہ کیا، بعد ازاں سیکیورٹی فورسز پہنچنے پر حملہ آور پسپا ہوئے۔

دوسری جانب کوئٹہ میں مشرقی بائی پاس کے علاقے میں ایگل فورس کے اہلکار معمول کی ڈیوٹی انجام دے رہے تھے کہ تین مشکوک افراد کو تلاشی دینے کی کوشش کے دوران اُن پر فائر کھول دیا گیا، جس میں دو اہلکار ہلاک اور ایک زخمی ہوا۔ 

بعد ازاں فرار ہونے والے مسلح افراد کے دوسرے ساتھیوں نے پیچھا کرنے والے اہلکاروں پر حملہ کیا، جس میں ایک سکیورٹی اہلکار ہلاک اور تین زخمی ہوئے جبکہ دو گاڑیوں کو نقصان پہنچا۔

محکمہ داخلہ بلوچستان کے معاون بابر یوسفزئی کے مطابق جھل مگسی میں پولیس نے حملے کو ناکام بنایا، ایک حملہ آور ہلاک اور ایک زخمی ہوا۔ 

صوبائی وزیر داخلہ میر ضیاء اللہ لانگو کی صدارت میں امن و امان کے حوالے سے اعلیٰ سطحی اجلاس بھی ہوا اور بلوچستان میں قیام امن کے لیے اہم فیصلے کیے گئے۔