بلوچستان: قلات میں عسکریت پسندوں کا حملہ، 2 سیکورٹی اہلکار ہلاک، میجر سمیت 3 زخمی

کوئٹہ (نمائندہ ڈیلی اردو) پاکستان کے صوبے بلوچستان کے ضلع قلات کے علاقے ہربوئی میں بلوچ عسکریت پسندوں کے حملے میں دو سیکورٹی اہلکار ہلاک جبکہ میجر رینک کے افسر سمیت تین اہلکار زخمی ہوگئے۔

سرکاری ذرائع کے مطابق ہلاک ہونے والوں میں نائیک محمد شریف اور نائیک باقر شامل ہیں، جبکہ زخمی اہلکاروں میں میجر حیسب عالم، نائیک محمد ضیاء اللہ اور نائیک جاوید احمد شامل ہیں۔

آج صبح سیکورٹی فورسز کے قافلے میں شامل گاڑی کو بم دھماکے میں نشانہ بنایا گیا، جس کی ذمہ داری کالعدم بلوچ لبریشن آرمی (بی ایل اے) نے قبول کرلی ہے۔

گزشتہ روز بھی اسی علاقے میں بی ایل اے نے موٹر سائیکلوں پر سوار سیکورٹی اہلکاروں پر گھات لگا کر حملہ کیا تھا، جس میں چار اہلکار ہلاک اور چھ زخمی ہوئے تھے۔ تنظیم نے حملے کی ویڈیو بھی جاری کی ہے، جس میں ہلاک اہلکاروں اور ان کے اسلحے کو دکھایا گیا ہے۔