بلوچستان: مچھ، کولپور میں حملوں کے بعد سیکیورٹی فورسز کا آپریشن، 24 دہشت گرد ہلاک

راولپنڈی (ڈیلی اردو) صوبہ بلوچستان کے علاقوں مچھ اور کولپور میں قانون نافذ کرنے والے اداروں نے دہشت گردوں کے حملے پسپا کرتے ہوئے گزشتہ تین روز کے دوران سرچ آپریشن میں 24 دہشت گردوں کو ہلاک کردیا۔

پاکستانی فوج کے شعبہ تعلقات عامہ ( آئی ایس پی آر) نے بتایا کہ دہشت گردوں نے بلوچستان کے علاقوں مچھ اور کولپور کمپلیکسز پر حملے کیے جنہیں قانون نافذ کرنے والے اداروں نے بہادری سے پسپا کیا۔

ترجمان پاک فوج نے بتایا کہ دہش گرد حملے 29 اور 30 جنوری کی رات کیے گئے، گزشتہ تین روز میں 24 دہشت گردوں کو ہلاک کیا گیا۔

آئی ایس پی آر کے مطابق مارے گئے دہشت گردوں میں شہزاد بلوچ، عطااللہ، عبدالودود، ذیشان اور ان کا ماسٹر مائنڈ شامل ہیں۔

بیان میں کہا گیا کہ سرچ آپریشن کے دوران مارے گئے دیگر دہشت گردوں کی شناخت کا عمل جاری ہے۔

آئی ایس پی آر نے بتایا کہ فائرنگ کے تبادلے میں قانون نافذ کرنے والے اداروں کے 4 اہلکاروں سمیت 6 افراد ہلاک ہوئے تھے۔

یاد رہے کہ 4 روز قبل بلوچستان کے ضلع بولان میں سیکیورٹی فورسز نے مچھ جیل پر کالعدم بلوچ لبریشن آرمی (بی ایل اے) کے دہشت گردوں کا حملہ ناکام بنادیا تھا۔

حملہ آوروں نے جیل کے مرکزی دروازے اور باؤنڈری وال پر راکٹ برسائے تھے، حملے میں پولیس اہلکار سمیت 2 افراد جاں بحق اور ایک بچے سمیت 4 افراد زخمی ہوگئے تھے، بعد میں سیکیورٹی فورسز نے دہشت گردوں کے خلاف سیکیورٹی کلیئرنس آپریشن متعدد دہشت گردوں کو ہلاک کردیا تھا۔