بلوچستان میں رواں سال دہشت گرد حملوں میں 139 اہلکاروں سمیت 330 افراد ہلاک، 467 زخمی

کوئٹہ (ڈیلی اردو) صوبہ بلوچستان میں دو ہزار تئیس میں عام شہریوں، پولیس اور ایف سی سمیت سیکیورٹی اہلکاروں پر حملوں میں ریکارڈ اضافہ ہوا ہے۔ گزشتہ بارہ ماہ کے دوران 139 اہلکاروں سمیت تین سو تیس افراد مارے گئے جبکہ 4 سو ستاسٹھ افراد زخمی بھی ہوئے ہیں۔

رپورٹس کے مطابق سال 2023 بھی بلوچستان میں پولیس، ایف سی اور شہریوں کیلئے کڑا امتحان ثابت ہوا ہے۔ سرکاری اعداد و شمار کے مطابق صوبے میں ایک سو انتالیس اہلکاروں سمیت 330 افراد کو خودکش حملوں، بم دھماکوں اور ٹارگٹ کلنگ میں نشانہ بنایا گیا۔ جبکہ چار سو ستاسٹھ افراد زخمی ہوئے ان میں ایک سوچوہتر اہلکار شامل ہیں۔

14 ستمبر کو مستونگ میں جے یو آئی کے مرکزی رہنما حافظ حمداللہ کی گاڑی کے قریب بم دھماکہ ہوا جس میں حافظ حمداللہ سمیت گیارہ افراد زخمی ہوئے بعد میں زخمی بس ڈرائیور دم توڑ گیا۔ 29 ستمبر کو مستونگ میں ہی عید میلادالنبی کے جلوس میں خودکش دھماکے میں ڈی ایس پی محمد نواز گشگوری سمیت 70 سے زائد افراد ہلاک ہوئے۔ 3 نومبر کو فورسز پر سب سے ہولناک حملہ پسنی کے قریب ہوا۔ جس میں سیکیورٹی فورسز کے 14 اہلکار ہلاک ہوئے۔

کاؤنٹر ٹیررازم ڈیپارٹمنٹ (سی ٹی ڈی) کے مطابق دہشتگردوں کے خلاف 90 انٹیلی جنس بیسڈ آپریشنز کیے گئے جس میں 106 دہشت گرد گرفتار ہوئے، دہشتگردوں کے قبضے سے 1100 کلو گرام دھماکہ خیز مواد، 48 عدد دستی بم، 4 عدد خودکش جیکٹس اور بھاری تعداد میں اسلحہ اور گولہ بارود بھی برآمد ہوا۔