بلوچستان: نوشکی میں سکیورٹی فورسز کا آپریشن، بی ایل اے کے 5 کمانڈرز ہلاک

کوئٹہ (نمائندہ ڈیلی اردو) پاکستان کے شورش زدہ صوبہ بلوچستان کے ضلع نوشکی میں سکیورٹی فورسز کے ٹارگٹڈ آپریشن میں کالعدم بلوچ لبریشن آرمی (بی ایل اے) کے پانچ اہم کمانڈرز ہلاک کر دیے گئے۔

سکیورٹی ذرائع کے مطابق خفیہ اطلاع ملی تھی کہ دہشت گرد نوشکی میں حملے کی منصوبہ بندی کر رہے ہیں اور نواحی علاقے میں اپنے ٹھکانے میں موجود ہیں، جس پر سکیورٹی فورسز کی بھاری نفری نے کارروائی کی۔

ذرائع کے مطابق دہشت گردوں نے فورسز کو دیکھتے ہی جدید خودکار ہتھیاروں سے فائرنگ شروع کر دی، تاہم جوابی کارروائی میں بی ایل اے کے پانچ کمانڈرز ہلاک ہو گئے۔

سکیورٹی فورسز نے دہشت گردوں کا ٹھکانہ مسمار کر کے بھاری مقدار میں اسلحہ، راکٹ لانچرز، بم، دھماکہ خیز مواد اور مواصلاتی آلات قبضے میں لے لیے۔ 

ذرائع کا کہنا ہے کہ ہلاک دہشت گرد سکیورٹی فورسز اور پولیس پر حملوں میں ملوث تھے۔