بلوچستان: پاکستانی چیک پوسٹ پر ایرانی سرزمین سے حملہ، ایک فوجی ہلاک، دوسرا زخمی

راولپنڈی (کاشف محمود) ایران سے دہشت گردوں کے حملے میں پاکستانی فوج کا ایک سپاہی ہلاک اور ایک زخمی ہو گیا۔

تفصیلات کے مطابق پاکستانی فوج کے شعبہ تعلقات عامہ آئی ایس پی آر کی طرف سے جاری کردہ بیان کے مطابق دہشت گردوں نے ایرانی علاقے سے فرنٹیئر کور (ایف سی) چوکی پر حملہ کیا، حملہ بلوچستان کے جنرل ایریا چوکب میں کیا گیا۔

آئی ایس پی آر کے مطابق دہشت گردوں نے چھوٹے ہتھیاروں سے چوکی پر حملہ کیا۔ فائرنگ سے پاک فوج کا سپاہی مقبول شاہ ہلاک جبکہ ایک جوان زخمی بھی ہوا۔

نمائندہ ڈیلی اردو کے مطابق سپاہی مقبول شاہ کا تعلق لیہ کے چک نمبر TDA/302 سے تھا۔

پاکستانی فوج کے شعبہ تعلقات عامہ کے مطابق ایران کے متعلقہ حکام کو واقعہ کے حوالے سے آگاہ کر دیا گیا ہے۔