بلوچستان: پشین میں خودکش حملہ آور سمیت طالبان کمانڈر اور 5 دہشت گرد ہلاک

کوئٹہ (نمائندہ ڈیلی اردو) پاکستان کے شورش زدہ صوبے بلوچستان کے ضلع پشین کے علاقے سرخاب مہاجر کیمپ کے قریب انٹیلی جنس بنیادوں پر کیے گئے آپریشن میں طالبان کمانڈر سمیت پانچ دہشت گرد ہلاک ہو گئے۔

سی ٹی ڈی حکام کے مطابق کارروائی خفیہ اطلاع پر کی گئی۔ آپریشن کے دوران دہشت گردوں نے فائرنگ کی جس پر سیکیورٹی اہلکاروں نے جوابی کارروائی کی۔ فائرنگ کے تبادلے میں پانچ دہشت گرد ہلاک ہو گئے۔

سرکاری ذرائع نے ڈیلی اردو کو بتایا کہ کارروائی کے دوران ایک خودکش حملہ آور کو روک لیا گیا تھا تاہم اس نے خود کو دھماکے سے اڑا لیا۔ ہلاک ہونے والوں میں گروہ کا سرغنہ عبدالہادی بھی شامل ہے۔

حکام کے مطابق ہلاک دہشت گردوں کے قبضے سے اسلحہ اور گولہ بارود برآمد کیا گیا ہے۔ ابتدائی تحقیقات کے مطابق دہشت گرد پولیس لائن اور کیڈٹ کالج پر حملے کی منصوبہ بندی کر رہے تھے۔

واقعے کے بعد علاقے کو گھیرے میں لے کر سرچ اور کلیئرنس آپریشن مکمل کر لیا گیا ہے جبکہ مزید تفتیش جاری ہے۔