بلوچستان: پشین میں سی ٹی ڈی کا آپریشن، تین مطلوب سمیت 5 شدت پسند ہلاک

کوئٹہ (ڈیلی اردو ) پاکستان کے شورش زدہ صوبے بلوچستان کے ضلع پشین میں کاؤنٹر ٹیررازم ڈیپارٹمنٹ (سی ٹی ڈی) اور حساس اداروں نے خفیہ اطلاع پر کارروائی کرتے ہوئے پانچ شدت پسندوں کو ہلاک کر دیا۔

سی ٹی ڈی نے پشین کے علاقے کلی کربلا میں بڑی کارروائی کرتے ہوئے مطلوب شدت پسند ثنااللہ آغا کو ہلاک کیا۔ ترجمان سی ٹی ڈی کے مطابق کارروائی کے دوران شدت پسندوں کے ساتھ فائرنگ کا شدید تبادلہ ہوا، جس میں مرکزی ملزم کے دو بھائیوں سمیت مجموعی طور پر 5 شدت پسند مارے گئے۔

فائرنگ کے تبادلے میں 10 سی ٹی ڈی اہلکار زخمی ہوئے، جنہیں فوری طور پر سی ایم ایچ کوئٹہ منتقل کیا گیا۔ ترجمان کے مطابق آپریشن کے دوران شدت پسندوں کے قبضے سے راکٹ لانچر، دستی بم اور بھاری اسلحہ برآمد کیا گیا۔

ہلاک شدہ شدت پسند دہشت گردی کے متعدد مقدمات میں مطلوب تھے۔ سی ٹی ڈی حکام کے مطابق یہ آپریشن ڈی آئی جی سی ٹی ڈی اعتزاز احمد گورایا کی سربراہی میں کیا گیا، جبکہ کلی کربلا میں کلیئرنس اور سرچ آپریشن مکمل کر لیا گیا ہے۔

دریں اثنا، انسپکٹر جنرل پولیس بلوچستان محمد طاہر نے سی ایم ایچ کوئٹہ کا دورہ کیا اور زخمی اہلکاروں کی عیادت کرتے ہوئے ان کی بہادری اور پیشہ ورانہ کارکردگی کو سراہا۔