بلوچستان: پنجاب سے تعلق رکھنے والے پانچ مزدور کیچ سے اغوا

کوئٹہ (ڈیلی اردو/آن لائن) صوبہ بلوچستان کے ضلع کیچ کی سب تحصیل ہوشاپ سے پنجاب کے پانچ افراد کو اغوا کرلیا گیا ہے۔

سرکاری ذرائع کے مطابق بدھ کی شام ضلع کیچ کی سب تحصیل ہوشاپ کے نواحی گاں ڈنڈار میں نامعلوم مسلح افراد نے صوبہ پنجاب سے تعلق رکھنے والے پانچ افراد کو اس وقت اغوا کرکے نامعلوم مقام پر منتقل کردیا جب وہ سرکاری ٹیلی کام کمپنی یوفون کے ایک نئے ٹاور کی تنصیب کے لیے وہاں کام کررہے تھے۔

لیویز ذرائع نے واقعہ کی تصدیق کی اور بتایا کہ اغوا کا یہ واقعہ بلوچستان کی شورش سے زیادہ متاثرہ ضلع آواران کے قریب تقریبا 7 کلومیٹر کیچ ضلع کے اندر پیش آیا۔

لیویز کے مطابق یہ افراد ایک کرولا گاڑی پر اس علاقے میں کام کے لیے سیکیورٹی کے بغیر گئے تھے۔ اغوا ہونے والوں میں نزیر احمد، محمد طارق، صفدر علی، فاروق اور حسنین شامل ہے۔

انتظامیہ کے مطابق اسسٹنٹ کمشنر تربت نے ڈپٹی کمشنر کیچ کی ہدایت پر لیویز کی ایک ٹیم مزکورہ علاقہ کی جانب روانہ کردیا ہے۔ تاہم ابھی تک مغویوں کے بارے میں معلومات حاصل نہیں ہوسکی۔