بلوچستان: چمن سے تحریک طالبان پاکستان کا دہشت گرد گرفتار

کوئٹہ (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) نے خفیہ اطلاع پر کارروائی کرتے ہوئے کالعدم تنظیم تحریک طالبان پاکستان کے دہشت گرد کو گرفتار کرکے پندرہ کلو گرام بارودی مواد برآمد کرلیا۔

ترجمان سی ٹی ڈی کے مطابق صوبہ بلوچستان کے سرحدی ضلع چمن میں سی ٹی ڈی ٹیم نے خفیہ اطلاع پر کارروائی کرتے ہوئے ایک دہشت گرد کو گرفتار کرلیا۔
 
ابتدائی تفتیش میں انکشاف ہوا ہے کہ دہشت گرد قانون نافذ کرنے والے اداروں اور سرکای تنصیبات کو نشانہ بنانا چاہتا تھا۔

ترجمان سی ٹی ڈی کا مزید کہنا ہے کہ کارروائی کے دوران 15 کلو گرام بارود، 2 عدد ڈیٹونیٹر، بال بیئرنگ اور پرائما کارڈ بھی برآمد کرلیا گیا ہے۔

ترجمان سی ٹی ڈی نے مزید بتایا کہ گرفتار دہشت گرد کے خلاف سی ٹی ڈی تھانہ میں ایف آئی آر درج کر لی گئی ہے۔

دہشت گرد کو مزید تحقیقات کے لیے نامعلوم مقام پر منتقل کردیا گیا ہے۔