بلوچستان: کوئٹہ کے بائی پاس سے تین افراد کی تشدد زدہ لاشیں برآمد

کوئٹہ (ڈیلی اردو) پاکستان کے شورش زدہ صوبے بلوچستان کے دارالحکومت کوئٹہ کے مشرقی بائی پاس سے تین افراد کی تشدد زدہ لاشیں برآمد ہوئی ہیں۔

ابتدائی اطلاعات کے مطابق لاشیں ایک سنسان مقام سے ملیں اور مقتولین کے ہاتھ پاؤں بندھے ہوئے تھے۔ 

مقامی ذرائع کا کہنا ہے کہ لاشوں پر تشدد کے نشانات بھی پائے گئے ہیں، تاہم ہلاکت کی حتمی وجوہات کا تعین پوسٹ مارٹم رپورٹ کے بعد ہی ہو سکے گا۔

اطلاع ملنے پر پولیس اور سکیورٹی اداروں کے اہلکار موقع پر پہنچ گئے اور شواہد اکٹھے کرنے کے بعد لاشوں کو شناخت اور قانونی کارروائی کے لیے سول اسپتال کوئٹہ منتقل کر دیا گیا۔

تاحال ہلاک ہونے والے افراد کی شناخت نہیں ہو سکی جبکہ واقعے کے محرکات بھی واضح نہیں ہیں۔ 

پولیس حکام کے مطابق مختلف پہلوؤں سے تحقیقات کا آغاز کر دیا گیا ہے اور علاقے میں سکیورٹی بڑھا دی گئی ہے۔ حکام کا کہنا ہے کہ شناخت کے عمل اور ابتدائی تحقیقات مکمل ہونے کے بعد مزید تفصیلات جاری کی جائیں گی۔