بلوچستان کے شکوے سننے اور حل کرنے کو تیار ہیں، شہباز شریف کا گرینڈ جرگے سے خطاب

کوئٹہ (ڈیلی اردو) وزیراعظم پاکستان شہباز شریف نے کہا ہے کہ بلوچستان کے لوگ دلیر ہیں لیکن اگر کوئی شکوہ ہے تو بیٹھ کر اس پر بات کرنی چاہیے۔

کوئٹہ میں بلوچستان گرینڈ جرگے سے خطاب میں وزیراعظم شہباز شریف نے کہا کہ دہشت گرد خون کے پیاسے ہیں اور پاکستان کی ترقی اور خوشحالی ان کو پسند نہیں۔

وزیراعظم نے گرینڈ جرگے کو کہا کہ دہشتگردوں کے راستے اور ان کے ہتھکنڈوں کو آپ کو ناکام بنانا ہے، اس حوالے سے جو نقائص ہیں، وہ ہم آپ کے مشورے سے دور کر سکتے ہیں۔

اس دوران وزیراعظم نے یہ اعلان بھی کیا کہ اگلے مالی سال میں ایک ہزار ارب روپے کے ترقیاتی پروگرام میں بلوچستان کا حصہ 250 ارب روپے ہو گا اور کوشش ہونی چاہیے کہ یہ فنڈ شفافیت کے ساتھ خرچ ہوں۔

پاکستان نے انڈین جارحیت کا صرف جواب نہیں دیا بلکہ بازی پلٹ دی، وزیراعظم

پاکستان کے وزیراعظم شہباز شریف نے کہا ہے کہ انڈیا کی جانب سے حالیہ جارحیت کا پاکستان نے صرف جواب نہیں دیا بلکہ بازی ہی پلٹ دی۔

کوئٹہ کے کمانڈ اینڈ سٹاف کالج میں خطاب کے دوران شہباز شریف نے کہا کہ پاکستان کی مسلح افواج ہماری خودمختاری اور سالیمت کی محافظ ہیں۔ انھوں نے کہا کہ ’انڈیا نے پہلگام کی آڑ میں جارحیت کی کوشش کی لیکن پاکستان نے صرف جواب نہیں دیا بلکہ بازی ہی پلٹ دی۔‘

وزیراعظم نے کہا کہ چھ مئی کو انڈیا نے حملہ کیا تو پاکستان نے زمین اور فضائی حدود میں منہ توڑ جواب دیا۔

واضح رہے کہ وزیر اعظم پاکستان کا یہ بیان ایسے وقت میں سامنے آیا ہے، جب آج ہی انڈین مسلح افواج کے چیف آف ڈیفنس سٹاف انیل چوہان نے پاکستان کی جانب سے طیارے گرائے جانے کے دعوؤں کے بارے میں پہلی مرتبہ جواب دیا۔

سنیچر کے روز بلوم برگ ٹی وی کے ساتھ انٹرویو میں جب ان سے پوچھا گیا کہ حالیہ تنازع کے دوران پاکستان انڈیا کے چھ لڑاکا طیارے گرانے میں کامیاب ہوا یا نہیں؟ تو انیل چوہان نے کہا کہ ’اہم بات یہ نہیں کہ طیارے گرائے گئے بلکہ یہ کہ وہ کیوں گرائے گئے۔ کیا غلطیاں ہوئیں، یہ باتیں اہم ہیں۔ نمبر اہم نہیں ہوتے۔‘

یاد رہے کہ پاکستان کی جانب سے انڈین طیارے گرائے جانے کے دعوے کی اس سے قبل انڈیا نے تصدیق یا تردید نہیں کی تھی اور انڈیا کے خارجہ سیکریٹری وکرم مسری نے ایک پریس بریفنگ میں کہا تھا کہ وہ اس بارے میں جواب صحیح وقت پر دیں گے۔

شہباز شریف نے دوران خطاب یہ بھی کہا کہ فیلڈ مارشل عاصم منیر کی پیشہ وارانہ صلاحیتوں کے باعث پاکستان کو تاریخی کامیابی ملی اور انھوں نے یہ ثابت کیا کہ وہ فیلڈ مارشل کے عہدے کے حقدار ہیں۔

وزیراعظم کا یہ بھی کہنا تھا کہ انڈیا کو پانی کو بطور ہتھیار استعمال کرنے کی اجازت نہیں دیں گے۔