بلوچستان: گوادر میں کوسٹ گارڈز پر بی ایل اے کا حملہ، تین اہلکار ہلاک

کوئٹہ (ڈیلی اردو) پاکستان کے شورش زدہ صوبے بلوچستان کے ایران سے متصل ساحلی ضلع گوادر کے علاقے جیونی میں دہشت گردوں کے حملے میں کوسٹ گارڈز کے تین اہلکار ہلاک ہو گئے ہیں۔

مکران ڈویژن کے ایک سینیئر سرکاری اہلکار نے واقعے کی تصدیق کرتے ہوئے بتایا کہ حملہ جیونی کی سمندری حدود میں اس وقت پیش آیا جب کوسٹ گارڈز کے اہلکار معمول کی گشت پر تھے۔ نامعلوم مسلح افراد نے اچانک فائرنگ کر کے اہلکاروں کو نشانہ بنایا۔

حکام کے مطابق حملے میں ہلاک ہونے والوں میں نائیک افضل، سپاہی جمیل اور سپاہی عمیر شامل ہیں۔ واقعے کے بعد سکیورٹی فورسز نے علاقے میں سرچ آپریشن شروع کر دیا ہے جبکہ واقعے کی تحقیقات بھی جاری ہیں۔

دوسری جانب اس حملے کی ذمہ داری کالعدم بلوچ لبریشن آرمی نے قبول کر لی ہے۔

واضح رہے کہ گزشتہ ماہ 15 تاریخ کو بھی جیونی کے علاقے پانوان میں کوسٹ گارڈز پر حملہ کیا گیا تھا، جس میں دو اہلکار ہلاک ہوئے تھے۔ جیونی تحصیل ایران سے متصل سرحدی علاقہ ہے اور یہ سرحد سے تقریباً 25 سے 30 کلومیٹر کے فاصلے پر واقع ہے۔