بلوچستان: ہرنائی میں آئل اینڈ گیس کمپنی کی سکیورٹی گاڑی پر دھماکا، 2 اہلکار ہلاک، 13 زخمی

کوئٹہ (بیورو رپورٹ) صوبہ بلوچستان کے ضلع ہرنائی کے علاقے وڑیک میں بارودی سرنگ کے دھماکے میں گیس اور تیل تلاش کرنے والی ماڑی کمپنی کے دو اہلکار ہلاک اور 13 زخمی ہوگئے۔

پولیس کے مطابق ماڑی گیس اینڈ آئل کمپنی کی گاڑی مزدوروں کو لے کر جارہی تھی اس دوران سڑک کنارے نصب بم پھٹ گیا۔ دھماکے سے گاڑی بری طرح سے متاثر ہوئی جبکہ اس میں سوار کم از کم دو اہلکار ہلاک اور 13 زخمی ہوگئے۔ زخمیوں میں سیکورٹی فورسز کے اہلکار بھی شامل ہے۔ جبکہ پولیس نے موقع پر پہنچ کر دھماکے کے مقام کو بھی سیل کر دیا ہے۔

دھماکے کے زخمیوں کو قریبی ہسپتال منتقل کردیا گیا جبکہ سیکیورٹی فورسز اور لیویز فورس دھماکےکی جگہ پہنچ گئیں۔

لیویز حکام نے ڈیلی اردو کو بتایا کہ زخمیوں میں کئی افراد کی حالت تشویشناک ہے جن کو کوئٹہ منتقل کیا گیا۔

اس حملے کی ذمہ داری کالعدم تنظیم بلوچ لبریشن آرمی نے قبول کی ہے۔

ترجمان جیئند بلوچ نے دعویٰ کیا ہے کہ گاڑی کو ریموٹ کنٹرول بم سے نشانہ بنایا گیا جس کے نتیجے میں 3 اہلکار ہلاک اور 12 زخمی ہوگئے۔

وزیر اعلیٰ بلوچستان سرفراز بگٹی نے محکمہ داخلہ سے ہرنائی میں دھماکے پر رپورٹ طلب کرلی۔

انہوں نے حکام کو ہدایت کی کہ ہرنائی دھماکے کے زخمیوں کو بہتر طبی سہولیات فراہم کی جائیں۔