بنوں میں سی ٹی ڈی اور پولیس کا مشترکہ آپریشن، دو دہشت گرد ہلاک

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں سی ٹی ڈی بنوں ریجن اور مقامی پولیس نے تھانہ میراخیل کے علاقے جھنڈوخیل روڈ، نزد شگی مچن خیل میں مشترکہ انٹیلیجنس بیسڈ آپریشن کے دوران دو خطرناک دہشتگردوں کو ہلاک کر دیا، جبکہ دو دیگر فرار ہونے میں کامیاب ہو گئے۔

پولیس کے مطابق ہلاک دہشتگردوں کی شناخت سہیل خان عرف سنگری اور اسماعیل عرف عثمان کے نام سے ہوئی، جو گزشتہ عرصے میں متعدد دہشتگردانہ کارروائیوں میں ملوث تھے، جن میں پولیس چیک پوسٹس شیخ لنڈک اور فتح خیل پر حملے، سیکیورٹی فورسز کے قافلے پر حملے، اور زیر تعمیر ریسکیو 1122 کی عمارت پر آئی ای ڈی حملہ شامل ہے۔ ان حملوں میں آٹھ پولیس اہلکار زخمی ہوئے تھے۔

آپریشن کے دوران ہلاک دہشتگردوں کے قبضے سے دو کلاشنکوف، ایک پستول، متعدد کارتوس، موٹرسائیکل، دو موبائل فونز، دو شناختی کارڈز اور کالعدم تنظیم ٹی ٹی پی کا ایک کارڈ برآمد کیا گیا۔

پولیس حکام کا کہنا ہے کہ فرار دہشتگردوں کی تلاش کے لیے آپریشن جاری ہے اور علاقے میں امن و امان کی صورتحال برقرار رکھنے کے لیے حفاظتی اقدامات بڑھا دیے گئے ہیں۔