بنوں میں پاکستانی طالبان کمانڈر سمیت 5 عسکریت پسند ہلاک، 7 زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع بنوں میں پولیس اور سکیورٹی فورسز نے عسکریت پسندوں کے خلاف مشترکہ آپریشن کیا، جس میں 5 عسکریت پسند ہلاک اور 7 زخمی ہو گئے۔ 

پولیس کے مطابق یہ کارروائی تھانہ ڈومیل کی حدود، اکبر علی خان کلے اسپرکہ میں کی گئی۔ فرار ہونے والے عسکریت پسندوں کی گرفتاری کے لیے علاقے میں سرچ آپریشن جاری ہے۔

پولیس حکام کے مطابق اس آپریشن میں پولیس، سی ٹی ڈی اور دیگر سیکیورٹی فورسز نے حصہ لیا، اور کارروائی صبح پانچ بجے سے شروع ہو کر دن بھر جاری رہی۔

ڈی آئی جی بنوں سجاد خان کا کہنا ہے کہ گزشتہ رات سے جاری آپریشن مکمل کرلیا گیا ہے۔

سیکیورٹی ذرائع کے مطابق ہلاک ہونے والے عسکریت پسندوں میں پاکستانی طالبان کا اہم ترین کمانڈر زیوران عرف بدری بھی شامل تھا، جو ضلع کرک کا رہائشی تھا۔ 

کمانڈر زیوران 2023 سے اب تک پولیس اور فوجی تنصیبات کے ساتھ ساتھ سیکیورٹی اہلکاروں کو نشانہ بنانے والے چار بڑے حملوں میں انتہائی مطلوب رہا ہے۔