بنوں میں پولیس اسٹیشن کے قریب دھماکا، بچے سمیت 2 افراد ہلاک، 20 زخمی

بنوں (ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں تھانہ میریان کے قریب ریموٹ کنٹرول بم کا دھماکہ ہوا جس کے نتیجے میں بچے سمیت دو افراد ہلاک اور 20 زخمی ہو گئے۔ ریجنل پولیس آفس بنوں کے ترجمان کا کہنا ہے کہ بارودی مواد تھانہ میریان کے سامنے دکانوں کے نزدیک موٹرسائیکل میں نصب کیا گیا تھا۔

میڈیکل اینڈ ٹیچنگ انسٹیٹیوٹ کے ترجمان نعمان خان نے بتایا کہ ڈسٹرکٹ ہیڈکوارٹر ہسپتال بنوں میں دو لاشیں اور 14 زخمی لائے گئے۔ ترجمان کے مطابق ہلاک افراد میں ایک بچہ ہے جس کی عمر نو یا 10 سال ہے اور ایک 24 یا 25 سال کا نوجوان ہے۔

بنوں کے ڈپٹی انسپکٹر جنرل (ڈی آئی جی) سجاد خان کے مطابق یہ دھماکہ بارودی مواد سے بھرے ایک رکشہ کے ذریعے کیا گیا، جو پولیس اسٹیشن کے باہر دکانوں کے سامنے کھڑا کیا گیا تھا۔ انہوں نے بتایا کہ میرین پولیس اسٹیشن کے باہر متعدد دکانیں واقع ہیں اور انہی میں سے ایک کے سامنے کھڑے کیے گئے رکشے میں آئی ای ڈی نصب کی گئی تھی۔

پولیس نے علاقے کو گھیرے میں لے کر سکیورٹی سخت کر دی ہے اور واقعے کی تحقیقات شروع کر دی گئی ہیں۔

پاکستان میں حالیہ برسوں کے دوران تشدد میں اضافہ دیکھنے میں آیا ہے اور حکومت اکثر اس کا الزام ٹی ٹی پی پر عائد کرتی ہے۔ یہ گروہ افغانستان کی طالبان حکومت سے الگ ہے مگر اس کا قریبی اتحادی سمجھا جاتا ہے۔ اسی لیے 2021 میں افغان طالبان کے دوبارہ اقتدار سنبھالنے کے بعد سے پاکستان میں ٹی ٹی پی کے حملوں میں تیزی دیکھی گئی ہے۔

دہشت گردانہ حملوں میں اضافے نے اسلام آباد اور کابل کے تعلقات میں بھی تناؤ پیدا کیا ہے کیونکہ پاکستان کا الزام ہے کہ ٹی ٹی پی افغانستان کے اندر آزادانہ طور پر سرگرم ہے۔ تاہم ٹی ٹی پی اور افغان طالبان دونوں ہی اس الزام کی تردید کرتے ہیں۔