بھیرہ موٹروے پر خوفناک ٹریفک حادثہ، 11 افراد آگ میں جھلس کر جاں بحق، 7 زخمی

بھیرہ (ڈیلی اردو) فیصل آباد سے اسلام آباد جانے والی مسافر وین بھیرہ موٹروے فلائی اوور کے قریب حادثے کا شکار ہوگئی، وین میں آگ لگنے سے 11 افراد جاں بحق اور 7 زخمی ہوگئے، زخمیوں کو ہسپتال منتقل کر دیا گیا ہے۔

تفصیلات کے مطابق فیصل آباد سے اسلام آباد جانے والی مسافر بس میں بھیرہ کے قریب موٹر وے پر ٹائر بلاسٹ ہونے پر آگ لگی جس کے نتیجے میں 11 مسافر جھلس کر جاں بحق ہوگئے جبکہ 7 افراد زخمی ہو گئے۔

پولیس کے مطابق یہ افسوناک واقعہ بھیرہ میں پیش آیا جہاں سپاں والا فلائی اوور کے قریب وین کا ٹائر پھٹنے کے بعد بے قابو ہوکر سائن بورڈ سے جا ٹکرائی۔ خوفناک حادثے کے بعد وین میں آگ بھڑک اٹھی جس سے 11 افراد جھلس کر جاں بحق ہو گئے۔

حادثے میں 7 افراد زخمی بھی ہوئے، جنہیں تحصیل ہیڈکوارٹر ہسپتال بھیرہ منتقل کیا گیا۔ ابتدائی طبی امداد دینے کے بعد زخمیوں کو سرگودھا ریفر کر دیا گیا ہے۔

ڈی آئی جی موٹروے اشفاق احمد کا المناک وین حادثے کے متعلق بریفنگ میں بتانا تھا کہ بدقسمت ہائی ایس میں ٹوٹل 17 افراد سوار تھے۔ جاں بحق ہونے والوں میں آٹھ مرد اور 3 خواتین شامل ہیں جبکہ چھ افراد زخمی ہیں۔ جن میں تین مرد، دو عورتیں اور ایک بچہ شامل ہیں۔ مسافر وین فیصل آباد سے اسلام آباد کی جانب جا رہی تھی۔

وزیراعلیٰ پنجاب عثمان بزدار نے انسانی جانوں کے ضیاع پر اظہار افسوس کیا اور انتظامیہ سے واقعے کی رپورٹ طلب کرلی۔