ترکی میں اسرائیلی قونصل خانے پر حملے کی کوشش ناکام، حملہ آور ہلاک، دو گرفتار

استنبول (ڈیلی اردو) ترکی کے شہر استنبول میں اسرائیلی قونصل خانے کے قریب حملے کی کوشش ناکام بنا دی گئی، پولیس کی جوابی کارروائی میں ایک مسلح حملہ آور ہلاک جبکہ دو کو زخمی حالت میں گرفتار کر لیا گیا۔

رپورٹس کے مطابق فائرنگ کے تبادلے کے دوران مجموعی طور پر تین افراد ہلاک ہوئے، جن میں حملہ آور بھی شامل ہیں، جبکہ دو پولیس اہلکار زخمی ہوئے۔

ترک وزیر داخلہ مصطفیٰ چفتچی کے مطابق حملہ آوروں نے یاپی کردی پلازہ کمپلیکس کے باہر پولیس پر فائرنگ کی، جس کے بعد سیکیورٹی اہلکاروں نے جوابی کارروائی کرتے ہوئے تینوں حملہ آوروں کو بے اثر کر دیا۔

وزیر انصاف آکِن گورلیک نے بتایا کہ واقعے کی اطلاع ملتے ہی استغاثہ نے تحقیقات کا آغاز کر دیا ہے اور ایک ڈپٹی چیف پراسیکیوٹر سمیت دو پراسیکیوٹرز کو جائے وقوعہ پر روانہ کیا گیا ہے۔

استنبول کے گورنر داؤد گل کے مطابق پلازہ میں قائم اسرائیلی قونصل خانہ گزشتہ ڈھائی سال سے بند ہے، جبکہ حکام کا کہنا ہے کہ اس وقت ترکی میں کوئی اسرائیلی سفارتکار تعینات نہیں۔

وزارت داخلہ کے مطابق ہلاک ہونے والے ایک حملہ آور کے روابط ایک ایسی تنظیم سے تھے جو مذہب کو اپنے مقاصد کے لیے استعمال کرتی ہے۔