جنوبی وزیرستان اور بنوں: عسکریت پسندوں نے امن کمیٹی کے سربراہوں کو دھماکوں میں نشانہ بنا دیا

بنوں/وانا  (نمائندگان ڈیلی اردو) پاکستان کے شورش زدہ صوبے خیبر پختونخوا کے قبائلی ضلع جنوبی وزیرستان اور ضلع بنوں میں امن کمیٹی کے سربراہوں کو دھماکوں کے ذریعے نشانہ بنایا گیا، تاہم کسی جانی ہلاکت کی اطلاع نہیں ملی۔

جنوبی وزیرستان

جنوبی وزیرستان اپر کی تحصیل سروکئی کے علاقے برواند/نیورغزئی میں عسکریت پسندوں کی جانب سے نصب کردہ آئی ای ڈی دھماکے میں امن کمیٹی کے سربراہ قدم خان زخمی ہو گئے جبکہ ان کی گاڑی تباہ ہو گئی۔

ڈسٹرکٹ پولیس آفیسر (ڈی پی او) ارشد خان کے مطابق دھماکہ امن کمیٹی کے سربراہ کی گاڑی کو نشانہ بنا کر کیا گیا۔ دھماکے کے نتیجے میں قدم خان کو معمولی نوعیت کے زخم آئے، جنہیں فوری طور پر طبی امداد کے لیے ہسپتال منتقل کر دیا گیا۔

واقعے کے بعد پولیس اور سکیورٹی فورسز نے علاقے کو گھیرے میں لے کر سرچ آپریشن اور تحقیقات کا آغاز کر دیا ہے۔

بنوں

دوسری جانب خیبر پختونخوا کے ضلع بنوں میں خوجڑی امن کمیٹی کے سربراہ ملک شیروز خان کے حجرے میں زوردار دھماکہ ہوا۔ پولیس کے مطابق عسکریت پسندوں نے حجرے کے ساتھ بارودی مواد نصب کیا تھا، جو رات گئے دھماکے سے پھٹ گیا۔

خوش قسمتی سے دھماکے میں کسی قسم کا جانی نقصان نہیں ہوا، تاہم حجرے کو جزوی نقصان پہنچا۔ واقعے کے بعد پولیس نے موقع پر پہنچ کر شواہد اکٹھے کیے اور تحقیقات شروع کر دی ہیں۔