حماس کا یرغمالیوں کی رہائی کا عمل معطل کرنے کا اعلان، غزہ میں ہر قسم کی صورتحال کیلئے تیار ہیں، اسرائیل کا ردعمل

غزہ + تل ابیب (ڈیلی اردو/بی بی سی) حماس کا کہنا ہے کہ وہ مزید اسرائیلی یرغمالیوں کی رہائی کو معطل کر رہا ہے۔

پیر کو حماس کے عسکری ونگ کی جانب سے جاری بیان میں کہا گیا ہے کہ ’وہ مزید اسرائیلی یرغمالیوں کی رہائی ’اگلی اطلاع تک‘ معطل کر رہا ہے۔

واضح رہے کہ تین مزید اسرائیلی یرغمالیوں کو سنیچر کو رہا کیا جانا تھا۔

حماس نے اپنے تحریری بیان میں کہا ہے کہ ’گذشتہ تین ہفتوں کے دوران تحریک کی قیادت نے دشمن کی خلاف ورزیوں اور معاہدے کی شرائط پر عمل کرنے میں ناکامی کا مشاہدہ کیا۔

بیان کے مطابق ’ان خلاف ورزیوں میں شمالی غزہ میں بے گھر ہونے والے افراد کی واپسی میں تاخیر، پٹی کے مختلف علاقوں میں انھیں شیلنگ اور فائرنگ سے نشانہ بنانا اور جس طرح اتفاق ہوا تھا اس طرح انسانی امداد کو یقینی بھی نہیں بنایا گیا۔‘

تحریری بیان کے مطابق ’دریں اثنا، تحریک (حماس) نے اپنے وعدوں کا مکمل احترام کیا ہے‘

بیان کے مطابق ’صہیونی قیدیوں کی رہائی جو کہ سنیچر فروری 15، 2025 کو کی جانی تھی کو اب تاحکم ثانی معطل کیا جاتا ہے۔

بیان میں کہا گیا ہے کہ اب اس کا انحصار معاہدے کی شرائط پر عملدرآمد پر ہے۔ حماس نے کہا کہ ’ہم معاہدے کی شرائط کے ساتھ اپنی وابستگی کا اعادہ کرتے ہیں جب تک کہ قابض (اسرائیل) ان پر قائم رہے گا۔‘

اسرائیلی ردعمل

دوسری جانب اسرائیل نے اپنے ردعمل میں کہا ہے کہ وہ غزہ میں ہر صورتحال کے لیے تیار ہے۔

اسرائیل کے وزیر دفاع نے کہا ہے کہ ’حماس کا اسرائیلی یرغمالیوں کی رہائی روکنے کا اعلان جنگ بندی معاہدے اور یرغمالیوں کی رہائی کے معاہدے کی مکمل خلاف ورزی ہے۔‘

اسرائیلی وزیر دفاع نے کہا ہے کہ ’میں نے اسرائیلی افواج کو ہدایت کی ہے کہ وہ غزہ میں کسی بھی ممکنہ منظرنامے اور کمیونیٹیز (اسرائیلی شہریوں) کی حفاظت کے لیے مکمل طور پر الرٹ اور ہر سطح پر تیار رہیں۔‘