خیبر میں دہشت گردوں کا کوہی پولیس چوکی پر حملہ، دو اہلکار زخمی

باڑہ (نمائندہ ڈیلی اردو) صوبہ خیبرپختونخوا کے قبائلی ضلع خیبر کی تحصیل باڑہ میں کوہی پولیس چوکی پر دہشت گردوں کے حملے میں دو پولیس اہلکار زخمی ہوگئے۔

https://twitter.com/ShabbirTuri/status/1748651243487023321?t=IbClEtJTOZYPbOT7oQFwNA&s=19

تفصیلات کے مطابق باڑہ میں کوہی ملک دین خیل پولیس چوکی پر رات گئے دہشت گردوں نے حملہ کردیا، جس کے نتیجے میں پولیس حولدار شیر زادہ خان اور کانسٹیبل نور ولی زخمی ہوگئے۔ جنہیں ہسپتال منتقل کردیا گیا ہے۔ پولیس کے مطابق دہشت گرد حملے کے دوران ایک پولیس کار بھی جل گئی۔

ذرائع کے مطابق پولیس نے جوابی کاروائی کرتے ہوئے دہشت گردوں کا حملہ پسپا کردیا، جس کے بعد حملہ آور فرار ہونے میں کامیاب ہوگئے۔

واضح رہے 3 روز قبل خیبر پختونخوا کے ضلع لکی مروت میں تھانہ غزنی اور تھانہ شہباز خیل پر دہشت گردوں کا حملہ ناکام بنادیا گیا۔ پولیس کی بھرپور جوابی کارروائی پر دہشت گرد فرار ہو گئے تھے۔

یاد رہے گزشتہ ماہ بھی تحصیل باڑہ میں ایف سی اور پولیس چیک پوسٹ پر دہشت گردوں کے حملے میں دو اہلکار ہلاک جبکہ 6 شدید زخمی ہوگئے تھے۔