خیبر میں سی ٹی ڈی اور سکیورٹی فورسز کا آپریشن، 3 دہشت گرد ہلاک

خیبر (نمائندہ ڈیلی اردو)پاکستان کے شورش زدہ صوبے خیبر پختونخوا کے قبائلی ضلع خیبر میں کاؤنٹر ٹیررازم ڈیپارٹمنٹ (سی ٹی ڈی) اور سکیورٹی فورسز نے مشترکہ کارروائی کے دوران تین دہشت گردوں کو ہلاک کر دیا، جبکہ متعدد دہشت گرد زخمی ہو گئے۔

سی ٹی ڈی کے مطابق کارروائی ضلع خیبر کے علاقے باڑہ مومانڑے میں دہشت گردوں کے ایک ٹھکانے پر کی گئی، جہاں خفیہ اطلاعات کی بنیاد پر چھاپہ مارا گیا۔

کارروائی کے دوران دہشت گردوں اور سکیورٹی فورسز کے درمیان شدید فائرنگ کا تبادلہ ہوا، جس کے نتیجے میں تین دہشت گرد موقع پر ہی ہلاک ہو گئے جبکہ متعدد زخمی ہونے کی اطلاعات ہیں۔

ذرائع کے مطابق کارروائی کے بعد سکیورٹی فورسز نے علاقے کو گھیرے میں لے کر کلیئرنس آپریشن شروع کر دیا ہے تاکہ کسی بھی ممکنہ خطرے کا مکمل خاتمہ کیا جا سکے۔

سکیورٹی حکام کا کہنا ہے کہ ہلاک دہشت گردوں سے اسلحہ اور اہم مواد برآمد کیا گیا ہے جبکہ علاقے میں سرچ آپریشن جاری ہے۔