خیبر پختونخوا: دہشت گرودں کا کسٹم اہلکاروں پر حملوں میں اضافہ، سیکیورٹی پلان ترتیب

پشاور (ڈیلی اردو) صوبہ خیبر پختون خوا کے ضلع ڈیرہ اسماعیل خان میں دہشت گردوں کا کسٹم اہلکاروں پر حملوں میں اضافہ ہونے سے سیکیورٹی پلان ترتیب دے دیا گیا۔

کسٹم کلکٹر کرم الٰہی کا کہنا ہے کہ ڈی آئی خان میں کسٹم اہلکاروں کو دن کے اوقات میں کام کرنےکی ہدایت کی گئی ہے۔ اسپیشل ڈیوٹی میں قانون نافذ کرنے والے اداروں کیساتھ ملکر آپریشنز کا فیصلہ کیا گیا ہے، حساس اضلاع میں کسٹم اہلکاروں کو جدید اسلحہ اور گاڑیاں فراہم کی جائے گی، جنوبی اضلاع میں کسٹم انٹیلی جنس کے 250 سے زائد اہلکار ڈیوٹیاں سر انجام دے رہے ہیں۔

کسٹم کلکٹر ڈی آئی خان کا کہنا ہے کہ پیٹرولنگ سے قبل کسٹم اہلکار ایس او پیز پر عمل درآمد کر رہے ہیں، اسمگلروں کے خلاف کریک ڈاؤن میں تیزی کے بعد حملے بڑھ گئے، تین دنوں میں 8 اہلکاروں کی ہلاکت ہوئی۔ جنوبی علاقوں میں گاڑیوں، ہتھیاروں کی فراہمی کیلئے اقدامات کررہے ہیں، کسٹم اہلکاروں نے تین ماہ میں 3 ارب 79کروڑروپے کی نان کسٹم پیڈ اشیاء ضبط کیں۔