خیبر پختونخوا: وادی تیراہ میں نقل مکانی، وزیرِ اعلیٰ سہیل آفریدی کا گرینڈ جرگہ بلانے کا اعلان

پشاور (ڈیلی اردو) پاکستان کے شورش زدہ صوبے خیبر پختونخوا کے وزیرِ اعلیٰ سہیل آفریدی نے اتوار کے روز جمرود فٹبال سٹیڈیم میں پورے صوبے کی تمام کمیونٹیوں کے لیے ایک گرینڈ جرگہ بلانے کا اعلان کیا ہے، تاکہ وادی تیراہ سے نقل مکانی کرنے والے عوام کے مسائل اور ان کے تجربات کو سامنے لایا جا سکے۔

وزیرِ اعلیٰ نے منگل کو جاری کیے گئے ویڈیو پیغام میں کہا کہ وادی تیراہ میں جاری نقل مکانی اور مبینہ آپریشن کے فیصلے بند کمروں میں کیے گئے، جن کے سنگین نتائج عوام کو بھگتنا پڑ رہے ہیں۔ ان کا کہنا تھا کہ صوبائی حکومت نے متاثرین کے تحفظ کے لیے چار ارب روپے کے پیکج کا اعلان کیا، تاہم وفاقی حکومت اس کو قبول نہیں کر رہی۔

صوبائی حکومت کا موقف

سہیل آفریدی نے کہا کہ خیبر پختونخوا اسمبلی میں تمام سیاسی اور مذہبی جماعتوں کے جرگوں میں اتفاق رائے پایا گیا تھا کہ فوجی آپریشن مسئلے کا حل نہیں ہے۔ دہشت گردی کا خاتمہ بات چیت، مشاورت اور جرگہ سسٹم کے ذریعے ممکن ہے۔

انہوں نے دعویٰ کیا کہ کور کمانڈر پشاور اور آئی جی ایف سی کی سربراہی میں 24 رکنی مقامی کمیٹی تشکیل دی گئی، جس نے تجویز دی کہ مقامی لوگوں کو تیراہ سے نکالا جائے کیونکہ جب تک لوگ موجود ہیں، آپریشن ممکن نہیں۔ وزیرِ اعلیٰ کا کہنا تھا کہ قوم نے اس فیصلے کو قبول نہیں کیا، لیکن شدید دباؤ اور برفباری کے موسم میں زبردستی نقل مکانی کرائی گئی۔

وزیرِ اعلیٰ نے زور دیا کہ بوڑھے، بچے اور خواتین شدید برفباری میں نقل مکانی پر مجبور ہوئے، جبکہ آپریشن اس وقت بھی ممکن نہیں تھا۔ انہوں نے کہا کہ کمیٹی نے آئی جی ایف سی اور کور کمانڈر سے وعدہ کیا تھا کہ دو مہینوں میں متاثرین کو واپس لایا جائے گا، لیکن وہ خود اس وعدے پر یقین نہیں رکھتے تھے۔

گرینڈ جرگہ اور عوامی رائے

سہیل آفریدی نے اعلان کیا کہ اتوار کو جمرود فٹبال سٹیڈیم میں گرینڈ جرگہ منعقد کیا جائے گا، جس میں عوام سے پوچھا جائے گا کہ آیا وہ اپنی مرضی سے نقل مکانی کر رہے ہیں یا زبردستی بے دخل کیے گئے۔

وفاق اور صوبائی حکومت کے درمیان اختلاف

اس سے قبل وفاقی وزیرِ دفاع خواجہ آصف نے اسلام آباد میں پریس کانفرنس کرتے ہوئے کہا کہ فوج وادی تیراہ میں کوئی آپریشن نہیں کر رہی اور صوبائی حکومت اپنی ناکامی کا ملبہ فوج یا ایسے آپریشن پر ڈالنا چاہتی ہے جس کا وجود ہی نہیں۔

خواجہ آصف نے دعویٰ کیا کہ گذشتہ برس 11 دسمبر کو ایک جرگہ تحریکِ طالبان پاکستان (ٹی ٹی پی) کے پاس گیا، جس نے علاقے سے لوگوں کی نقل مکانی کے بارے میں بات کی اور بعد میں حکومت سے بھی ملا۔ بعد میں 24 اور 31 دسمبر کو بھی یہ جرگہ حکومت سے ملاقاتیں کرتا رہا۔ وزیرِ دفاع نے کہا کہ شاید صوبائی حکومت کو اس بارے میں معلومات نہ ہوں، لیکن جرگہ دونوں فریقین سے ملا۔

آئی بی اوز اور آپریشنز

سہیل آفریدی نے سوال اٹھایا کہ اگر 22 بڑے اور 14 ہزار سے زائد انٹیلیجنس بیسڈ آپریشنز (آئی بی اوز) سے بدامنی ختم نہیں ہوئی، تو مزید آپریشنز سے کون سے فائدے حاصل ہوں گے؟