خیبرپختونخوا پولیس دہشتگردی کے خلاف فرنٹ لائن پر لڑ رہی ہے، سہیل آفریدی

پشاور (ڈیلی اردو) پاکستان کے شورش زدہ صوبے خیبرپختونخوا کے وزیراعلیٰ محمد سہیل آفریدی نے کہا ہے کہ صوبائی پولیس دہشتگردی کے خلاف فرنٹ لائن پر لڑ رہی ہے اور حکومت ان کی ہر ممکن معاونت کرے گی۔

پشاور میں امن و امان سے متعلق جائزہ اجلاس کی صدارت کرتے ہوئے وزیراعلیٰ نے ہدایت کی کہ عوام کے جان و مال کا تحفظ ہر صورت یقینی بنایا جائے۔ 

انہوں نے کہا کہ قانون نافذ کرنے والے ادارے واضح حکمت عملی کے تحت کام کریں اور صوبائی حکومت انہیں مکمل وسائل فراہم کرے گی۔

وزیراعلیٰ نے ہدایت کی کہ رمضان المبارک کے دوران عبادات اور مذہبی اجتماعات کے لیے فول پروف سکیورٹی انتظامات یقینی بنائے جائیں۔ ان کا کہنا تھا کہ دستیاب وسائل کا مؤثر استعمال کیا جائے اور کسی بھی ناخوشگوار واقعے سے نمٹنے کے لیے متعلقہ ادارے ہمہ وقت تیار رہیں۔

اجلاس میں چیف سیکرٹری، انسپکٹر جنرل پولیس، ایڈیشنل انسپکٹر جنرل محکمہ انسداد دہشتگردی، ایڈیشنل چیف سیکرٹری داخلہ اور ایڈیشنل انسپکٹر جنرل سپیشل برانچ نے شرکت کی۔