داعش کی پاکستانی وزیر اعظم کو سنگین دھمکی، اہم شخصیات کو نشانہ بنانے کا اعلان

واشنگٹن (ش ح ط) شدت پسند تنظیم اسلامک اسٹیٹ (داعش) نے اپنے رکن شریف اللہ کو امریکہ کے حوالے کرنے پر پاکستان میں اعلیٰ قیادت کو نشانہ بنانے کی دھمکی دی ہے۔ پشتو زبان میں جاری ایک آڈیو پیغام میں داعش نے وزیر اعظم شہباز شریف اور سابق وزیر اعظم نواز شریف کو حملوں کا ہدف بنانے کا ذکر کیا ہے۔

واضح رہے کہ حکومت پاکستان نے 5 مارچ کو شریف اللہ کو امریکہ کے حوالے کیا تھا۔ شریف اللہ اگست 2021 میں کابل کے حامد کرزئی انٹرنیشنل ایئرپورٹ پر ہونے والے ایبی گیٹ خودکش بم دھماکے میں ملوث تھے، جس میں افغانستان سے امریکی افواج کے انخلا کے دوران 13 امریکی فوجی اور 170 کے قریب افغان شہری ہلاک ہوئے تھے۔ امریکہ کو اس کی حوالگی دو طرفہ تعاون کے تحت کی گئی تھی، جس کے بعد داعش نے شدید ردعمل دیا ہے۔

سیکیورٹی حکام کا کہنا ہے کہ دھمکی کے بعد ملک میں حفاظتی اقدامات مزید سخت کر دیے گئے ہیں، اور اہم شخصیات کی سیکیورٹی کو از سرِ نو جائزہ لیا جا رہا ہے۔ دوسری جانب، حکومت پاکستان کی طرف سے تاحال اس دھمکی پر کوئی باضابطہ ردعمل سامنے نہیں آیا۔

یہ پہلا موقع نہیں جب داعش نے پاکستان میں حملوں کی دھمکی دی ہو، تاہم وزیر اعظم اور سابق وزیر اعظم کو براہ راست نشانہ بنانے کا اعلان خطرے کی شدت کو ظاہر کرتا ہے۔

سیکیورٹی ماہرین کا کہنا ہے کہ حکومت کو اس معاملے پر فوری اور مؤثر حکمتِ عملی اپنانا ہوگی تاکہ کسی بھی ممکنہ دہشت گرد کارروائی کو ناکام بنایا جا سکے۔