سرینگر: کشمیر میں شدت پسندوں کا حملہ، 3 بھارتی فوجی ہلاک، 12 زخمی

سرینگر (ڈیلی اردو) بھارت کے زیر اہتمام کشمیر میں مزید دو کشمیری نوجوانوں کو ہلاک کردیا جبکہ شدت پسندوں نے حملہ کر کے تین بھارتی اہلکاروں کو ہلاک جبکہ درجن سے زائد زخمی ہوگئے۔

کشمیر میڈیا سروس (کے ایم ایس) کے مطابق بھارتی فوجیوں، پیرا ملٹری فورسز اور پولیس اہلکاروں نے نوجوانوں کو ضلع سرینگر کے علاقے رنگریٹ میں محاصرے اور تلاشی کی مشترکہ کارروائی کے دوران ہلاک کیا۔ آخری اطلاعات آنے تک علاقے میں فوجی آپریشن جاری تھا۔ بھارتی حکام نے علاقے کے تمام داخلی اور خارجی راستوں کو سیل کر دیا اور انٹرنیٹ موبائل سروس معطل کر دی۔

ادھر نوجوانوں کی ہلاکت پر علاقے کے لوگوں نے زبردست احتجاجی مظاہرہ کیا۔ مظاہرین کا کہنا تھا دونوں نوجوان بے گناہ تھے اور ان کو جعلی مقابلے میں ہلاک کیا گیا۔

دوسری طرف نامعلوم مسلح افراد نے سرینگر میں پنتھہ چوک کھنموہ روڈ پر زیون کے مقام پر انڈین ریزرو پولیس کی 9 ویں بٹالین کی گاڑی پر اندھادھند فائرنگ کی جس سے 3 اہلکار ہلاک جبکہ درجن سے زائد زخمی ہو گئے۔

کشمیر میڈیا سروس کی رپورٹ کے مطابق بعض اہلکاروں کی حالت تشویشناک بتائی جاتی ہے۔

حکام کے مطابق تمام زخمی اہلکاروں کو قریبی ہسپتال منتقل کردیا گیا۔ علاقے کا محاصرہ کر کے بڑے پیمانے پر تلاشی کی کارروائی شروع کی گئی ہے۔