سعودی دباؤ: پاکستان کا سوڈان سے اربوں ڈالر کا اسلحہ معاہدہ معطل

اسلام آباد (ڈیلی اردو/روئٹرز) نیوز ایجنسی روئٹرز کے مطابق دو پاکستانی سکیورٹی ذرائع اور ایک سفارتی ذریعے نے بتایا ہے کہ سعودی عرب نے اس معاہدے کو ختم کرنے کی درخواست کی تھی اور عندیہ دیا تھا کہ وہ اس خریداری کی مالی معاونت نہیں کرے گا۔

معاہدے کے تحت پاکستان کو سوڈان کو 1.5 ارب ڈالر مالیت کا اسلحہ اور جنگی طیارے فراہم کرنا تھے۔

یہ معاملہ پہلی بار جنوری میں سامنے آیا تھا جب رپورٹ کیا گیا کہ معاہدہ آخری مراحل میں ہے اور سعودی عرب کی ثالثی سے طے پایا، تاہم اس وقت ریاض کی مالی معاونت کا ذکر نہیں کیا گیا تھا۔

ایک سکیورٹی ذریعے کے مطابق، ’’سعودی عرب نے اشارہ دیا کہ پاکستان کو یہ معاہدہ ختم کر دینا چاہیے کیونکہ اس نے مالی معاونت کا ارادہ ترک کر دیا ہے۔‘‘

سعودی حکومت کے میڈیا دفتر نے اس پر فوری تبصرہ نہیں کیا، جبکہ سوڈان کی مسلح افواج نے بھی روئٹرز کے سوالات کا جواب نہیں دیا۔ پاکستان کی فوج نے بھی اس خبر پر تبصرے کی درخواست کا کوئی جواب نہیں دیا، اور اس سے قبل بھی اس معاہدے کی باضابطہ تصدیق نہیں کی گئی تھی۔

ذرائع کے مطابق بعض مغربی ممالک نے سعودی عرب کو مشورہ دیا تھا کہ وہ افریقہ میں پراکسی جنگوں سے دور رہے۔ سعودی عرب اور متحدہ عرب امارات ماضی میں خطے کے مختلف تنازعات میں اکثر مخالف فریقوں کی حمایت کرتے رہے ہیں، جن میں سوڈان بھی شامل ہے۔

سوڈان میں فوج اور نیم فوجی دستوں ریپڈ سپورٹ فورسز کے درمیان جاری تنازعہ تقریباً تین سال سے شدید انسانی بحران کو جنم دے چکا ہے۔ 

اس جنگ نے بیرونی طاقتوں کے مفادات کے ٹکراؤ کو بھی بڑھا دیا ہے اور خدشہ ظاہر کیا جا رہا ہے کہ بحیرۂ احمر کے ساحل پر واقع یہ ملک ٹوٹ پھوٹ کا شکار ہو سکتا ہے۔