سوات میں دہشت گردوں اور سی ٹی ڈی کے درمیان فائرنگ، ایلیٹ فورس اہلکار ہلاک

سوات (نمائندہ ڈیلی اردو) پاکستان کے شورش زدہ صوبہ خیبرپختونخوا کے سیاحتی ضلع سوات میں دہشت گردوں اور سکیورٹی اہلکاروں کے درمیان فائرنگ کے تبادلے میں ایلیٹ فورس کا ایک اہلکار ہلاک ہوگیا ہے۔

ڈیلی اردو کے مطابق سوات کے علاقے شلخو سر میں مسلح دہشت گردوں اور محکمہ انسداد دہشت گردی (سی ٹی ڈی) کی ٹیم کے درمیان فائرنگ کا تبادلہ ہوا، جس کے دوران ایلیٹ فورس اہلکار گلفام خان ہلاک ہوگئے۔

ذرائع کے مطابق گلفام خان کا تعلق ضلع کوہاٹ سے تھا اور وہ ایلیٹ فورس میں خدمات انجام دے رہے تھے۔

واقعے کے بعد سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے، جبکہ دہشت گردوں کی موجودگی کے پیش نظر مزید کارروائیاں جاری ہیں۔

حکام کی جانب سے واقعے کی مزید تفصیلات اور فائرنگ کے تبادلے میں دہشت گردوں کے ممکنہ نقصان سے متعلق معلومات تاحال سامنے نہیں آئیں۔