سی ٹی ڈی کی پنجاب میں کارروائیاں، 4 دہشت گرد گرفتار

لاہور (اے ڈی شہزاد) کاؤنٹر ٹیررزم ڈیپارٹمنٹ پنجاب نے صوبے بھر میں کارروائیوں کے دوران چار دہشت گردوں کو گرفتار کرلیا۔

ترجمان سی ٹی ڈی کے مطابق صوبے بھر میں 22 انٹیلی جینس بیسڈ آپریشنز کرتے ہوئے 4 دہشت گردوں کو گرفتار کرلیا گیا ہے، گرفتار دہشت گردوں کے قبضے سے بارودی مواد، اسلحہ اور بم بنانے کا دیگر سامان برآمد ہوا ہے۔

ترجمان سی ٹی ڈی کے مطابق سی ٹی ڈی نے چنیوٹ میں کارروائی کرتے ہوئے کالعدم تحریک طالبان پاکستان (TPP) سے تعلق رکھنے والے دہشتگرد کو گرفتار کیا۔

دہشتگرد کی شناخت عبدالرحیم مکی کے نام سے ہوئی۔ دہشتگرد کے قبضے سے 1100 گرام بارودی مواد اور بم بنانے کا دیگر سامان برآمد ہوا۔ سی ٹی ڈی نے ساہیوال میں کارروائی کرتے ہوئے کالعدم تحریک طالبان پاکستان (ٹی ٹی پی) سے تعلق رکھنے والے غفار کو گرفتار کیا۔

گرفتار دہشتگرد کے قبضے سے ایک ہینڈ گرینڈ اور بم بنانے کا دیگر سامان برآمد ہوا۔ سی ٹی ڈی نے راولپنڈی میں بھی کارروائی کرتے ہوئے کالعدم ٹی ٹی پی کے رحیم اکبر کو گرفتار کرلیا۔

سی ٹی ڈی نے دعویٰ کیا ہے کہ گرفتار دہشتگرد فرقہ وارانہ فسادات پھیلانے کی کوشش کر رہا تھا، دہشتگرد کے قبضہ سے اشتعال انگیر پمفلٹس برآمد ہوئے۔

سی ٹی ڈی نے ایک اور کارروائی کرتے ہوئے ملتان سے کالعدم تحریک جعفریہ پاکستان سے تعلق رکھنے والے حسن رضا کو گرفتار کیا۔ گرفتار دہشتگرد فرقہ وارانہ فسادات پھیلانے کی کوشش کر رہا تھا۔

ترجمان سی ٹی ڈی کا کہنا ہے کہ سی ٹی ڈی نے تمام گرفتار افراد کے خلاف مقدمہ درج کرکے تفتیش شروع کردی ہے۔