سی ٹی ڈی کا پنجاب کے مختلف شہروں میں آپریشن، بی ایل اے کے چیف کمانڈر سمیت 14 دہشت گرد گرفتار

لاہور (ڈیلی اردو) دہشتگردی کے خدشات کے پیش نظر پنجاب کے مختلف شہروں میں آپریشن کر کے کالعدم تحریک طالبان پاکستان (ٹی ٹی پی) کے 14 دہشت گردوں سمیت 22 افراد کو گرفتار کر لیا گیا۔

ترجمان کاؤنٹر ٹیررازم ڈیپارٹمنٹ (سی ٹی ڈی) کے مطابق انٹیلی جنس بیسڈ آپریشن کے دوران لاہور سے 6، راولپنڈی سے 6، بہاول پور سے 2، گوجرانوالہ سے3، بہاولنگر سے1، ننکانہ صاحب سے1، فیصل آباد سے1، شیخوپورہ سے1، سرگودھا سے 1 دہشت گرد کو گرفتار کیا گیا، بہاول پور سے بلوچ لبریشن آرمی (بی ایل اے) کے چیف کمانڈر ارشد کو گرفتار کر لیا گیا۔

سی ٹی ڈی کے ترجمان نے مزید بتایا کہ دہشت گردوں سے بارودی مواد، 1 ہینڈ گرینڈ،2 ای ڈی بم، 28 ڈیٹونیٹر، پرائما کارڈ، 20 حفاظتی فیوز، موبائل فون اور نقدی برآمد کر لی، دہشت گردوں کی شناخت سفیان، پرویز، توقیر، حکمت اللہ، فیضان حیدر، عامر، عبدالرشید اور حسنین وغیرہ کے نام سے ہوئی ہے۔

حکام کے مطابق دہشت گرد قانون نافذ کرنے والے اداروں پر حملے کی منصوبہ بندی کر رہے تھے، رواں ہفتے 1289 کومبنگ آپریشنز کے دوران 4164 مشتبہ افراد گرفتار کئے، کومبنگ آپریشنز میں 55317 افراد سے پوچھ گچھ کی گئی۔

حکام نے مزید کہا کہ سی ٹی ڈی محفوظ پنجاب کے ہدف پر عمل پیرا ہے، دہشت گردی کے ناسور کو جڑ سے اکھاڑ پھینکنے کے لئے پرعزم ہیں۔