شام: روسی فضائی حملوں میں داعش کے 200 جنگجو ہلاک

دمشق (ڈیلی اردو) روسی طیاروں کی شام میں بمباری کے نتیجے میں 200 دہشت گرد ہلاک ہوگئے۔

غیر ملکی خبر رساں ادارے کے مطابق شام کے شہر پالمیرا میں روسی طیاروں کی بمباری کے نتیجے میں 200 دہشت گرد ہلاک ہوگئے۔

روس کی جانب سے جاری بیان میں کہا گیا ہے کہ فضائی حملے میں دولت اسلامیہ/داعش دہشت گرد ٹھکانوں کو نشانہ بنایا گیا جس میں داعش کے کم از کم 200 دہشت گرد مارے گئے جب کہ 24 گاڑیاں اور 500 کلو کے قریب دھماکا خیز مواد کو بھی تباہ کردیا گیا۔

روس کے حملہ کی جگہ سے داعش کے دہشت گرد شام کے مختلف شہروں میں حملوں کی منصوبہ بندی کرتے تھے اور اسلحہ سمیت دیگر بارودی مواد بھی بنایا جاتا تھا جب کہ آئندہ صدارتی انتخابات سے قبل شام میں عدم استحکام پیدا کرنے کی منصوبہ بندی یہاں کی جارہی تھی۔

پیر کے روز روسی وزارت دفاع نے اس بات کی تصدیق کی کہ “دہشت گرد” شامی حکومت کے زیر کنٹرول علاقوں میں متعدد کیمپوں میں تربیت حاصل کر رہے ہیں۔