شمالی وزیرستان میں رابطہ پل، لکی مروت میں گیس پائپ لائن دھماکے سے تباہ

بنوں /میرانشاہ (نمائندگان ڈیلی اردو) پاکستان کے شورش زدہ صوبے خیبر پختونخوا کے دو اضلاع میں رات گئے پیش آنے والے دو الگ الگ واقعات میں عسکریت پسندوں نے شمالی وزیرستان میں ایک اہم رابطہ پل اور لکی مروت میں گیس پائپ لائن کو دھماکوں کے ذریعے نشانہ بنایا۔

پولیس ذرائع کے مطابق شمالی وزیرستان کی تحصیل شیواہ میں دریائے کرم پر قائم رابطہ پل کو بارودی مواد کے ذریعے تباہ کیا گیا، جس کے نتیجے میں پل مکمل طور پر منہدم ہو گیا۔ پل کی تباہی سے میرعلی، میران شاہ، ٹل اور دیگر ملحقہ علاقوں کے درمیان زمینی رابطہ منقطع ہو گیا، جس کے باعث مقامی آبادی کو شدید مشکلات کا سامنا ہے۔

دوسری جانب ضلع لکی مروت میں تھانہ ڈاڈیوالہ کی حدود میں انڈس ہائی وے کے قریب عسکریت پسندوں نے گیس پائپ لائن کو دھماکے سے نقصان پہنچایا۔ واقعے کے بعد علاقے میں گیس کا اخراج جاری ہے، جس سے حفاظتی خدشات پیدا ہو گئے ہیں۔

پولیس اور سکیورٹی فورسز نے دونوں مقامات کو گھیرے میں لے کر صورتحال کو کنٹرول میں لے لیا ہے جبکہ واقعات کی مزید تحقیقات شروع کر دی گئی ہیں۔ 

حکام کے مطابق کسی جانی نقصان کی اطلاع موصول نہیں ہوئی۔