شمالی وزیرستان میں سکیورٹی فورسز کا آپریشن، 8 پاکستانی طالبان ہلاک

راولپنڈی (ڈیلی اردو) پاکستان کے شورش زدہ صوبے خیبر پختونخوا کے قبائلی ضلع شمالی وزیرستان میں سکیورٹی فورسز کی کارروائی کے دوران کالعدم تحریک طالبان پاکستان کے 8 دہشت گرد ہلاک کر دیے گئے۔

پاکستانی فوج کے شعبہ تعلقات عامہ آئی ایس پی آر کے مطابق پاک افغان سرحد کے قریب دہشت گردوں کے ایک گروہ کی نقل و حرکت کی اطلاع پر فورسز نے بروقت اور مؤثر کارروائی کی۔

آئی ایس پی آر کے مطابق کارروائی کے دوران بھارتی سرپرستی یافتہ کالعدم تحریک طالبان پاکستان سے تعلق رکھنے والے 8 دہشت گرد ہلاک کیے گئے، جبکہ ان کے قبضے سے اسلحہ اور گولہ بارود بھی برآمد کیا گیا۔

بیان میں کہا گیا ہے کہ علاقے میں موجود دیگر دہشت گردوں کے خاتمے کے لیے کلیئرنس آپریشن جاری ہے اور قانون نافذ کرنے والے ادارے دہشت گردی کے مکمل خاتمے تک کارروائیاں جاری رکھیں گے۔

آئی ایس پی آر کا کہنا ہے کہ افغان طالبان حکومت اپنی سرحدی ذمہ داریوں کو مؤثر انداز میں پورا کرنے میں ناکام رہی ہے، اور اسے چاہیے کہ وہ اپنی سرزمین کو دہشت گردوں کے استعمال سے روکے اور اپنے شہریوں کو پاکستان میں دہشت گردی میں ملوث ہونے سے باز رکھے۔