صومالیہ: کیفے میں خودکش دھماکا، 15 افراد ہلاک، 20 افراد زخمی

موغادیشو (ڈیلی اردو) صومالیہ میں خودکش حملے کے نتیجے میں 15 سے زائد افراد ہلاک اور 20 افراد زخمی ہو گئے۔

غیر ملکی خبر رساں ایجنسی کے مطابق وسطی صومالیہ کے شہر بلد وینہ کے ایک کیفے میں خودکش حملہ آور نے خود کو بم سے اڑا لیا۔ دھماکے میں ہلاک ہونے والے افراد کی لاشوں اور زخمیوں کو قریبی اسپتال منتقل کیا گیا۔ جہاں پر متعدد زخمیوں کی حالت تشویشناک ہے۔

پولیس کے مطابق خودکش حملہ صوبہ حران کے دارالحکومت بلد وینہ میں ایک پُر ہجوم کیفے میں کیا گیا جہاں اُس وقت کئی سیاستدان اور مقامی حکام موجود تھے۔

عینی شاہدین کے مطابق دھماکہ انتہائی زوردار تھا جس کے بعد جائے وقوعہ پر بھگدڑ مچ گئی۔ ہلاک ہونے والوں میں فوجی اہلکار اور عام شہری بھی شامل ہیں۔