غزہ: اسرائیلی فضائی حملے میں حماس کے سیاسی رہنما ہلاک

غزہ (ڈیلی اردو) حماس کے ایک عہدیدار نے اتوار کے روز برطانوی خبر رساں ادارے بی بی سی کو بتایا کہ غزہ کے جنوبی شہر خان یونس پر ایک اسرائیلی فضائی حملے میں حماس کے سیاسی رہنما صلاح البردویل ہلاک ہوئے ہیں۔

مقامی لوگوں کا کہنا ہے کہ فضائی حملے میں بردویل اور ان کی بیوی دونوں کی ہلاکت ہوئی ہے۔ بردویل حماس کے سیاسی دفتر کے اہم رکن تھے۔

اسرائیل نے تاحال اس بارے میں کوئی تبصرہ نہیں کیا ہے۔

منگل سے اسرائیلی فوج نے دوبارہ غزہ میں بڑے پیمانے پر کارروائیاں شروع کیں۔ اسرائیل کا الزام ہے کہ حماس نے جنگ بندی کے معاہدے میں توسیع کی پیشکش سے انکار کیا تھا۔ حماس نے اسرائیلی الزام کی تردید کی ہے اور کہا کہ اسرائیل نے 19 جنوری کو طے پانے والے سیز فائر معاہدے کی خلاف ورزی کی۔ یہ معاہدہ قطر، مصر اور امریکہ کی ثالثی میں طے پایا تھا۔

قطری نشریاتی ادارے الجزیرہ کے مطابق جنوبی غزہ میں مزید ہلاکتوں کی اطلاع ملی ہے، جب کہ قدس نیوز نیٹ ورک کا کہنا ہے کہ رفح کے علاقے تل السلطان پر اسرائیلی حملے میں مزید متعدد افراد ہلاک اور زخمی ہوئے ہیں۔

یہ حملہ ایسے وقت میں ہوا ہے، جب اسرائیل کے آج صبح سویرے حملے میں ہلاک ہونے والوں کی تعداد کم از کم 23 تک جاپہنچی تھی۔

دوسری جانب اسرائیلی افواج جنوبی لبنان پر بھی مبینہ راکٹ حملے کے بعد بھی حملے جاری رکھے ہوئے ہیں، جس میں کم از کم 7 افراد ہلاک ہو گئے اور 4 ماہ قبل حزب اللہ کے ساتھ طے پانے والے جنگ بندی معاہدے کو خطرہ لاحق ہے۔

دریں اثنا، یمنی میڈیا کے مطابق، امریکا نے یمن پر اپنے فضائی حملے جاری رکھے ہوئے ہیں، الحدیدہ کے ہوائی اڈے پر 3 اور بحیرہ احمر میں السلف کی بندرگاہ پر ایک اور حملہ کیا گیا ہے۔

حماس کے مطابق غزہ کی پٹی میں گذشتہ 24 گھنٹوں کے دوران اسرائیلی کارروائیوں میں 32 فلسطینیوں کی ہلاکت ہوئی ہے۔

خیال رہے کہ 7 اکتوبر 2023 کو حماس نے اسرائیل میں ایک حملہ کیا تھا جس میں 1200 افراد ہلاک جبکہ 251 کو یرغمال بنایا گیا تھا۔ حماس کے مطابق اس کے بعد سے غزہ میں اسرائیلی کارروائیوں میں 49 ہزار سے زیادہ فلسطینیوں کی ہلاکت ہوئی ہے۔

دریں اثنا اسرائیل نے لبنان میں متعدد راکٹ حملے کیے ہیں۔ دونوں ملکوں کے درمیان نومبر میں جنگ بندی ہوئی تھی۔

لبنان کی وزارت صحت کے مطابق ان حملوں میں سات افراد ہلاک ہوئے ہیں۔