قلات میں سیکیورٹی فورسز کا آپریشن، بی ایل اے کے 4 عسکریت پسند ہلاک

راولپنڈی (نمائندہ ڈیلی اردو) پاکستان کے شورش زدہ صوبے بلوچستان کے ضلع قلات میں سیکیورٹی فورسز نے خفیہ اطلاع پر کامیاب آپریشن کے دوران کالعدم بلوچ لبریشن آرمی (بی ایل 

اے) سے تعلق رکھنے والے چار عسکریت پسندوں کو ہلاک کر دیا۔

پاکستانی فوج کے شعبہ تعلقات عامہ (آئی ایس پی آر) کے مطابق سیکیورٹی فورسز کو قلات میں دہشت گردوں کی موجودگی سے متعلق مصدقہ خفیہ معلومات موصول ہوئی تھیں، جس پر فوری کارروائی کرتے ہوئے علاقے میں انٹیلی جنس بیسڈ آپریشن کیا گیا۔ آپریشن کے دوران فورسز اور دہشت گردوں کے درمیان شدید فائرنگ کا تبادلہ ہوا، جس کے نتیجے میں چار عسکریت پسند ہلاک ہو گئے۔

آئی ایس پی آر کا کہنا ہے کہ ہلاک دہشت گرد علاقے میں متعدد دہشت گردانہ سرگرمیوں میں ملوث تھے اور سیکیورٹی فورسز سمیت عام شہریوں کو نشانہ بنانے کی کارروائیوں میں بھی شامل رہے۔ کارروائی کے دوران دہشت گردوں کے قبضے سے بھاری مقدار میں اسلحہ، گولہ بارود اور دھماکہ خیز مواد برآمد کیا گیا۔

فوج کے مطابق علاقے میں ممکنہ مزید دہشت گردوں کی موجودگی کے پیشِ نظر کلیئرنس اور سینیٹائزیشن آپریشن جاری ہے۔

آئی ایس پی آر نے واضح کیا ہے کہ ملک میں دہشت گردی کے مکمل خاتمے کے لیے ’’عزمِ استحکام‘‘ کے تحت انسدادِ دہشت گردی مہم پوری قوت کے ساتھ جاری رہے گی اور سیکیورٹی فورسز قوم کے امن و استحکام کے تحفظ کے لیے پرعزم ہیں۔