لاہور کے علاقے داتا دربار سے تحریک طالبان پاکستان کا اہم رکن گرفتار

لاہور (اے ڈی شہزاد) کاؤنٹر ٹیررازم ڈیپارٹمنٹ نے صوبہ پنجاب کے صوبائی دارالحکومت لاہور کے علاقے داتا دربار میں کارروائی کرتے ہوئے کالعدم تنطیم تحریک طالبان پاکستان کے دہشت گرد کو گرفتار کرلیا۔

تفصیلات کے مطابق سی ٹی ڈی اور پولیس سمیت دیگر قانون نافذ کرنیوالے اداروں نے گزشتہ رات لاہور کے مختلف مقامات پر مشتبہ افراد کی اطلاعات پر کومبنگ آپریشن کئے۔ اس دوران داتا دربار کے قریب سے کالعدم تنظیم تحریک طالبان پاکستان کے اہم رکن کو گرفتار کر لیا گیا ہے۔

سی ٹی ڈی ذرائع کا کہنا تھا کہ دہشتگرد عتیق اللہ کا تعلق آزاد کشمیر سے ہے، جس کو گزشتہ رات داتا دربار سے سی ٹی ڈی کے مشترکہ آپریشن کے دوران دہشت گرد کو گرفتار کیا گیا۔

ترجمان کا کہنا تھاکہ مبینہ دہشت گرد کو تفتیش کیلئے نامعلوم مقام پرمنتقل کیا گیا ہے جبکہ مبینہ دہشت گرد کے خلاف مقدمہ بھی درج کرلیا گیا۔