لکی مروت میں سیکورٹی فورسز کا آپریشن، 4 عسکریت پسند ہلاک

لکی مروت (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع لکی مروت میں سیکیورٹی فورسز نے انٹیلیجنس بیسڈ آپریشن کے دوران 4 عسکریت پسند ہلاک کر دیے۔

پاکستانی فوج کے شعبہ تعلقات عامہ (آئی ایس پی آر) کے مطابق 18 اور 19 فروری کی درمیانی شب کالعدم تحریک طالبان پاکستان کے عسکریت پسندوں کی موجودگی کی اطلاع پر کارروائی کی گئی۔

آئی ایس پی آر کے مطابق آپریشن کے دوران سیکیورٹی فورسز نے عسکریت پسندوں کے ٹھکانے کو مؤثر انداز میں نشانہ بنایا۔ شدید فائرنگ کے تبادلے کے بعد 4 عسکریت پسند ہلاک کر دیے گئے۔

بیان میں کہا گیا ہے کہ ہلاک عسکریت پسندوں سے اسلحہ اور گولہ بارود بھی برآمد ہوا، جبکہ یہ عناصر علاقے میں متعدد دہشتگرد کارروائیوں میں ملوث تھے۔

سیکیورٹی فورسز کی جانب سے علاقے میں کلیئرنس آپریشن جاری ہے۔ آئی ایس پی آر کے مطابق سیکیورٹی فورسز عزمِ استحکام کے تحت دہشتگردی کے خلاف کارروائیاں جاری رکھیں گی۔