لکی مروت میں پولیس گاڑی پر دھماکا، 6 پولیس اہلکار اور راہگیر زخمی

لکی مروت (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع لکی مروت میں تھانہ شہباز خیل کی پولیس موبائل پر موٹرسائیکل میں نصب بم کے ذریعے دھماکہ ہوا، جس کے نتیجے میں 6 پولیس اہلکاروں سمیت ایک راہگیر زخمی ہو گیا۔ زخمیوں کو فوری طور پر ڈی ایچ کیو ہسپتال منتقل کر دیا گیا ہے۔

پولیس کے مطابق دھماکے میں زخمی ہونے والے اہلکاروں میں ایک اے ایس آئی جمال الدین، پانچ پولیس اہلکار اور ڈرائیور میر حسن شامل ہیں۔ 

پولیس حکام نے بتایا کہ یہ حملہ بارودی مواد کے ذریعے نشانہ بنانے کی کوشش تھی اور متعدد پولیس اہلکار زخمی ہوئے ہیں۔

ریسکیو ذرائع کا کہنا ہے کہ ایمبولینس فوری طور پر جائے حادثہ پر روانہ کی گئی اور زخمیوں کو طبی امداد کے لیے ہسپتال پہنچایا گیا۔ پولیس اور ریسکیو حکام علاقے میں تحقیقات اور سیکیورٹی اقدامات جاری رکھے ہوئے ہیں۔