مغربی کنارے میں اپنے ہی ساتھی اہلکار کی فائرنگ سے اسرائیلی فوجی ہلاک

بیت المقدس (ڈیلی اردو) مقبوضہ مغربی کنارے میں ایک اسرائیلی فوجی نے فلسطینی حملہ آور ہونے کے شبہ میں فائرنگ کرکے اپنے ہی ساتھی فوجی اہلکار کو ہلاک کر دیا۔

اسرائیلی فوج نے منگل کے روز ایک بیان میں کہا کہ 20 سالہ نتن فیتوسی کو گزشتہ رات فلسطین کے قصبے تلکرم کے قریب اپنے ہی ساتھی کی طرف سے فائر کی گئی 2 گولیاں لگیں۔

بیان کے مطابق گولیاں لگنے سے نتن فیتوسی شدید زخمی ہوگیا اور بعد ازاں ہسپتال میں اسے مردہ قرار دیدیا گیا۔

اسرائیلی فوج نے اس سے قبل ایک بیان میں کہا تھا کہ نتن فیتوسی کو فائرنگ کے حملے میں نشانہ بنایا گیا، لیکن فوج نے منگل کی صبح جاری ایک نئے بیان میں اپنا بیانیہ تبدیل کرتے ہوئے کہا کہ نتن فیتوسی درحقیقت اپنے ہی ساتھی فوجی کی فائرنگ سے ہلاک ہوا ہے۔

بیان میں کہا گیا ہے کہ اسرائیلی دفاعی فورسز (آئی ڈی ایف) کی ملٹری پولیس نے واقعے کی تحقیقات شروع کر دی ہیں۔

Staff Sgt. Natan Fitoussi, 20, was tragically killed last night by IDF fire near the Judea and Samaria security barrier.

We express our deepest condolences to his family and will continue to support them. pic.twitter.com/Ll7jOQDgiR

— Israel Defense Forces (@IDF) August 16, 2022