مہمند میں شدت پسندوں کے ٹھکانوں پر بمباری

واشنگٹن (ش ح ط) صوبہ خیبر پختونخوا کے قبائلی ضلع مہنمد میں پاکستانی جیٹ طیاروں سے مقامی طالبان کے ٹھکانوں پر بمباری کی گئی ہے جس کے نتیجے میں ہلاکتوں کا خدشہ ہے۔

مقامی ذرائع کے مطابق گزشتہ رات تحصیل خویزئی بائزئی کے مختلف علاقوں سوران درہ، میٹئی اور شمشاہ میں جیٹ طیاروں نے شدت پسندوں کے ٹھکانوں پر بمباری کی۔ جس کے نتیجے میں ہلاکتوں کا خدشہ ہے۔

سرکاری ذرائع نے شدت پسندوں کے کئی ٹھکانوں کو تباہ کرنے کا دعویٰ بھی کیا ہے لیکن آزاد ذرائع سے اس کی تصدیق نہیں ہوئی ہے۔

ذرائع کے مطابق یہ علاقے کالعدم تنظیم تحریک طالبان پاکستان (جماعت الاحرار) کے مضبوط گڑھ تصور کیے جاتے ہیں، تاہم طالبان ذرائع نے دعویٰ کیا ہے کہ اس کارروائی میں تنظیم کو کوئی جانی نقصان نہیں پہنچا البتہ متعدد عام شہری جن میں خواتین اور بچے بھی شامل ہیں زخمی ہوئے ہیں۔

ٹی ٹی پی کے سابق ترجمان نے بتایا کہ گزشتہ رات مہمند میں ہونے والی پاکستانی طیاروں کی بمباری میں تمام مجاہدین محفوظ رہے ہیں۔ تاہم مقامی آبادی کو نقصان اٹھانا پڑا ہے۔ بمباری کے نتیجے میں کئی گھروں کو جزوی نقصان پہنچا ہے، جبکہ خواتین اور بچوں سمیت کچھ افراد زخمی ہوئے ہیں۔

ذرائع کا کہنا ہے فضائی کارروائی کے بعد مقامی آبادی میں شدید خوف و ہراس پھیل گیا اور کئی خاندان محفوظ مقامات کی جانب نقل مکانی پر مجبور ہو گئے، علاقہ مکینوں کے مطابق بمباری کے نتیجے میں کئی گھروں کو نقصان پہنچا جس سے متاثرین کی مشکلات میں اضافہ ہوا ہے۔

پاکستانی فوج کی جانب سے ان حملوں کے بارے میں کوئی باضابطہ بیان سامنے نہیں آیا ہے۔