نائیجیریا: مسلح شخص نے ٹرین کے انتظار میں کھڑے 32مسافر اغواء کرلئے

لاگوس (ڈیلی اردو) نائیجیریا میں ایک شخص نے گاڑی کا انتظار کرتے 32 مسافروں کو اسلحے کے زور پر یرغمال بنا کر اغوا کر لیا۔

غیر ملکی خبر رساں ادارے رائٹرز کے مطابق ریاستی گورنر کی ویب سائٹ کے مطابق ریاست ایڈو کے ٹام ایکیمی ریلوے اسٹیشن پر اے کے 47 سے لیس مسلح شخص نے ریلوے اسٹیشن پر موجود 32 افراد کو یرغمال بنانے کے بعد اغوا کر لیا ہے۔

Gunmen kidnap 32 people from southern Nigeria train station https://t.co/P8Vlxyzw2I pic.twitter.com/QkuQ6tZmSw

— Reuters (@Reuters) January 9, 2023

پولیس کا کہنا ہے کہ چرواہوں کے قبیلے کے ایک شخص نے اسلحے کے زور پر تیل کی پیداوار میں مرکزی حیثیت کے حامل شہر ’واری‘ جانے کیلئے ٹرین کا انتظار کرنے والے 32 مسافروں کو اسلحے کے زور پر اغوا کر لیا ہے جبکہ اسٹیشن پر موجود کچھ لوگوں کو گولیاں لگنے کی بھی اطلاعات ہیں۔

میڈیا رپورٹ کے مطابق واقعہ افریقہ کے سب سے زیادہ آبادی رکھنے والے ملک کے طول اور عرض میں پھیلتے ہوئے عدم تحفظ کے احساس کی ایک تازہ مثال ہے اور اس صورتحال کو ملک میں آئندہ ماہ ہونے والے صدارتی انتخابات کیلئے ایک چیلنج سمجھا جا رہا ہے۔

مقامی انتظامیہ کے مطابق مغویوں کی تلاش کیلئے پولیس، فوج اور مقامی باشندوں پر مشتمل ٹیمیں تشکیل دے دی گئی ہیں، امید ہے چند گھنٹوں میں مغویوں کو تلاش کرکے اغواکار کے چنگل سے بازیاب کرالیا جائے گا۔