ٹانک میں آپریشن، پولیس اہلکاروں پر حملوں میں ملوث 2 دہشت گرد ہلاک

ٹانک (نمائندہ ڈیلی اردو) پاکستان کے شورش زدہ صوبے خیبرپختونخوا کے ضلع ٹانک میں محکمہ انسداد دہشت گردی (سی ٹی ڈی) نے خفیہ اطلاعات کی بنیاد پر ایک کامیاب کارروائی کرتے ہوئے دو انتہائی مطلوب دہشت گردوں کو ہلاک کر دیا۔

سی ٹی ڈی کے مطابق ڈیرہ ریجن نے معتبر اور قابل عمل انٹیلی جنس معلومات کی بنیاد پر شیخ اوتار، تھانہ گومل کے علاقے میں ایک اہم آپریشن کیا۔ اس آپریشن کا مقصد علاقے میں موجود انتہائی مطلوب دہشت گردوں کا فوری خاتمہ اور عوام کے تحفظ کو یقینی بنانا تھا۔

بیان میں کہا گیا کہ آپریشن کے دوران دہشت گردوں نے سی ٹی ڈی ٹیم پر فائرنگ کی، جس کے تبادلے کا سلسلہ تقریباً 40 منٹ تک جاری رہا۔ فائرنگ کے تھم جانے کے بعد دوران سرچ آپریشن، ٹی ٹی پی مشتاق گروپ کے دو انتہائی مطلوب دہشت گرد، امداد اللہ اور توقیر، ہلاک پائے گئے۔ ہلاک دہشت گردوں سے دو کلاشنکوفیں، 6 میگزین، کارتوس اور 2 بینڈولیئرز برآمد ہوئے۔

سی ٹی ڈی نے بتایا کہ ہلاک دہشت گرد امداد اللہ اور توقیر گراں اسلم، آئی ای ڈی حملوں میں ملوث تھے، جن میں ایک حملے میں 5 پولیس اہلکار ہلاک ہوئے تھے۔ اس کے علاوہ وہ گورنمنٹ گرلز مڈل اسکول روڑی میں پولیس اہلکاروں کو یرغمال بنانے اور کنوڑی پتن میں پولیس وین کو آئی ای ڈی حملے میں اڑانے کے واقعوں میں بھی ملوث تھے، جہاں دو پولیس اہلکار ہلاک ہوئے۔

مزید بتایا گیا کہ ہلاک دہشت گرد دیگر سنگین وارداتوں میں بھی ملوث تھے، جن میں ڈیرہ ٹانک روڈ پر پولیس موبائل پر حملے، ٹانک روڈ پر ججز کانوائے پر حملے، ہیڈ کانسٹیبل عزیز کی ٹارگٹ کلنگ اور کانسٹیبل ریحان کے اغوا اور ہلاکت شامل ہیں۔

آئی جی خیبرپختونخوا اور ایڈیشنل آئی جی سی ٹی ڈی نے کامیاب کارروائی پر اسپیشل ویپنز اینڈ اسٹرائیک ٹیم کے جوانوں کو شاباش دی اور کہا کہ ہمارے جوان عوام کے تحفظ کے لیے ہر وقت چوکس اور مستعد ہیں اور اس طرح کے آپریشنز کے ذریعے دہشت گردوں کو ان کے منطقی انجام تک پہنچایا جائے گا۔